हामी सबैकाे संसारन्यूज

७ पुष, काठमाण्डौं । बैदेशिक रोजगारीका लागि विदेश जाने कामदारले अब म्यानपावर धाएर बैदेशिक रोजगारीका लागि रोजगारदाता कम्पनीको चयन गर्नपर्ने समस्याको अन्त्य हुने भएको छ ।

यस्तो समस्यालाई दूर गर्ने प्रयास बैदेशिक रोजगार विाभागले गर्न थालेको हो । युवाको हात या साथमा इन्टरनेट छ भने आफूले जानेको, आफू जानकारी रहेको या रोजेको काम युवाले अनलाइनमार्फतनै चयन गर्न पाउने भएका छन् ।

बैदेशिक रोजगार विभागले सूचना प्रणालीलाई व्यवस्थापन गर्ने क्रममा देशभरीका म्यानपावरले विदेशी रोजगारदाता कम्पनीबाट ल्याएको कामदार मागको विवरण आफ्नो वेवसाइटमा राख्न थालेको हो ।

उक्त वेवसाइटमा म्यानपावर कम्पनीले कुन देशबाट कति कामदारको माग तथा कति पारीश्रमिक भन्ने कुरा युवाले सोहि वेवसाइट खोलेर जानकारी लिन सक्ने बैदेशिक रोजगार विभागले जानकारी दिएको छ ।

यसभन्दा अगाडि म्यानपावरहरुले विभिन्न पत्रपत्रिकामा रोजगारीको अवसर भनेर डिमान्ड आएको सूचना ल्याउने गरेका थिए । तर, त्यसमा धेरै युवाको पहुँच नपुग्ने देखिएको र त्यसमा छुटेकाहरुले वैदेशिक रोजगार विभागको वेवसाइटमा हेरेर जानकारी लिन सक्ने पनि विभागले बताएको छ ।

विभागका अनुसार विभागले ल्याएको यस्तो व्यवस्थापछि म्यानपावरले गलत सूचना दिएर युवाहरुलाई झुक्याउने प्रवृत्तिको अन्त्य हुने समेत बताइएको छ । यस्तो व्यवस्थाले इन्टरनेट चलाउन जानेको युवाले आफ्नो फोनबाटै विभागको साइटमा उक्त सूचना हेरेपछि सम्पूर्ण जानकारी लिन सक्नेछन् ।

८५३ म्यानपावर कम्पनीहरुलाई समावेस गरिएको बताइएको उक्त वेवसाइटमा ती म्यानपावरले विभिन्न देशबाट ल्याएको डिमान्डको जानकारी अनिवार्यरुपमा साइटमा राख्न पर्नेछ ।

त्यसका लागि विभागको वेवसाइट www.dofe.gov.np  मा लगइन गर्नासाथ विभागको साइटमा ‘बैदेशिक रोजगारीको खोजी’ भन्ने शिर्षकमा अगाडि नै देख्न सकिने र भित्र क्लिक गरेर कुन देशका कुन कम्पनीबाट कस्तो कामदारको माग आएको छ भनेर हेर्न सकिनेछ । यो व्यवस्थाले नेपालमा एउटा काम र विदेशमा गएपछि अर्को काम तथा तलब फरक हुने समस्याबाट कामदार मुक्त हुने विस्वास विभागले लिएको छ ।