Sansar News
१० माघ, काठमाण्डौं । चीनबाट फैलिएको कोरोना भाइरस, मकाउ, थाइल्याण्ड, जापान, अमेरिका लगायतका देशमा फैलिएर जनजीवन त्रासमय बनाइरहेको बेला नेपालमा पनि यसको रोकथामका लागि पूर्वतयारी गर्नुपर्ने चिकित्सकहरुको भनाई छ ।
शुक्रराज ट्रपिकल टेकुका सरुवा रोग विशेषज्ञ डा. शेर बहादुर पुनले मुलुकको एकमात्र त्रिभुवन अन्तराष्ट्रिय विमानस्थलमा विशेष चिकित्सक सहितको हेल्थ डेस्क तत्काल खडा गर्नुपर्ने बताएका छन् । पुनले कोरोना भाइरसबाट बच्नका लागि विशेष गरेर भारत र चीनका सीमा नाकामा विशेष ध्यान दिनुपर्ने समेत सुझाएका छन् ।
त्यस्तै ट्रपिकलकै अर्का विशेषज्ञ डा. अनुप बाँस्तोलाले पनि कोरोना भाइरसको सम्भावित जोखिमबाट बच्नका लागि इबोला भाइरस फैलिएका बेलाजस्तै हेल्थ डेस्क स्थापना गर्नुपर्ने बताएका छन् ।
उनले यो भाइरसबाट जोगिनका लागि सरकारले अहिले नै तयारी थाल्नुपर्ने सुझाव दिएको पनि शुक्रबारको नागरिक दैनिकमा समाचार छ ।
वि.सं.२०७६ माघ १० शुक्रवार ०८:४५ मा प्रकाशित
