हामी सबैकाे संसारन्यूज

३ फागुन फिदिम । पाँचथरको कुम्मायक गाउँपालिकाका अध्यक्ष जय बहादुर चेम्जोङ एकपछि अर्को घटनामा मुछिएका छन् । एक महिलालाई घर निकाला गरेको मुद्दाको किनारा नलाग्दै भ्रूणहत्या आरोपमा पीडित पक्षले अध्यक्ष चेम्जोङविरुद्ध उजुरी दिएको छ ।

‘अध्यक्षको दबाबमा भ्रुण हत्या’ शिर्षकमा समाचार प्रकाशित भएपछि अध्यक्षसहित सातजना विरुद्ध प्रहरीमा किटानी जाहेरी परेको हो । चेम्जोङले नै गत जेठ १७ गते कुम्मायक गाउँपालिका ४ यासोक बजारकी विष्णुमाया सम्बाहाम्फेलाई घर निकाला गरेका थिए । भदैनी पर्ने गीतामाया सम्बाहाम्फेसँगको आर्थिक लेनदेन विवादलाई लिएर उनले विष्णु मायालाई घर निकाले गरेको समाचार शनिबारको अन्नपूर्णपोष्ट दैनिकमा रहेको छ ।

‘भदैनीसँगको आर्थिक लेनदेन मिलाइदिन गाउँपालिकालाई आग्रह गरेकी थिएँ,’ विष्णु माया भन्छिन्, ‘ हाम्रो विवाद मिलाइदिनुको साटो गाउँपालिकाका अध्यक्षले मलाई उल्टै घर निकाला गरिदिए । अन्यायमा परेपछि मैले जिल्ला अदालतमा मुद्दा हालेको हुँ ।’

त्यस्तै चेम्जोङविरुद्ध माघ २२ गते भ्रूण हत्या आरोपमा प्रहरीमा किटानी जाहेरी परेको छ । यासोक बजारकै १९ वर्षीया किशोरीलाई २१ साताको गर्भ फाल्न बाध्य पारेको आरोपमा सातजनाविरुद्ध उजुरी परेको हो ।

कुम्मायक ५ स्याकबरुम्बाका रमेश खड्कासँग अन्तरजातीय विवाह गरेकी दलित किशोरीलाई गर्भपतन गराउन चेम्जोङले दवावदिएको पीडितको भनाई छ । हाल चेम्जोङसहित चारजना फरार छन् । प्रहरीले अनुसन्धानका लागि तीनजनालाई नियन्त्रणमा लिएको छ ।