हामी सबैकाे संसारन्यूज

३ फागुन, काठमाण्डौं । कुवेतको एक कन्ट्रक्सन कम्पनीमा कार्यरत  ६ नेपालीको जमिन खन्ने क्रममा  माघ २९ गते बालुवाको ढिस्कोले पुरिएर मृत्यु  भएकोप्रति   नेपाली साझा मन्चले नेपाल सरकार तथा अन्तराष्ट्रिय निकायको ध्यानाकर्षण गराएको छ ।

मन्चका संयोजक महेश  श्रेष्ठद्धारा जारी गरिएको    प्रेस विज्ञप्तिमा मृत्यु भएका ६ जना र घाईते  २ जनाको उपचार मृतकका परिवारलाई  उचित क्षतिपूर्ति ता  घटनाका बारेमा अन्तराष्ट्रियतहबाट छानविन गर्न अनुरोध गर्दै   नेपाल सरकार तथा अन्तराष्ट्रिय श्रम संगठनको ध्यानाकर्षण गराइएको हो ।  ।

‘यस घटनाको अन्तर्राष्ट्रियतहबाट छानबिन गर्न, दोषी पक्षहरुलाई कार्वाही गर्न र यस घटनामा परेर मृत्यु र घाइते भएकाहरुको परिवारलाई उचित क्षतिपूर्ति दिलाउन साथै घाइतेहरुको पूर्णरुपमा स्वास्थ्य उपचार गराउन अन्तर्राष्ट्रिय समुदाय र अन्तर्राष्ट्रिय श्रमिक संगठन International Labour Organization संग हामी अपिल गर्दछौं ।’ विज्ञप्तिमा भनिएको छ ।

प्रेस विज्ञप्ती

कुवेतको Al Mutlaa City Project मा Universal Leaders Trading & General Contracting Co. WLL मार्फत कार्यरत रहेका नेपालीहरु मध्ये ६ जनाको मृत्यु र २ जना घाइते हुने गरी फेब्रुअरी १२, २०२० (२०७६ माघ २९ गते) भएको अप्रिय दुर्घटना कामदारहरुलाई निर्जिव यन्त्र सरह प्रयोग गरिएको र अन्तर्राष्ट्रिय सुरक्षा मापदण्ड अवलम्बन नगरी काममा लगाइएका कारण उक्त दुखद घटना भएको देखिन्छ । वैदेशिक रोजगारमा रहेका कामदारहरुलाई उनीहरुको दक्षता र क्षमता नभएका काममा जबर्जस्ती र प्रलोभनमा पारेरमा काममा लगाइदै आएको कारण यस्ता घटनाहरु पटकपटक भई रहेका छन् । यस्ता घटनाप्रति नेपाल सरकार र श्रमिकहरुका हकहीतका लागि भनेर खोलिएका राष्ट्रिय तथा अन्तर्राष्ट्रिय संघसंस्था र संगठनहरुको निरन्तरको वेवास्ताका कारण खाडी मुलुक गरिब राष्ट्रका श्रमिकहरुका लागि यमलोक जानु सरह हुँदै आएको छ । अन्तर्राष्ट्रीय सुरक्षा मापदण्ड अवलम्बन नगरी जबर्जस्ती श्रमिकहरुलाई खानीको उत्खनन्, जमिनमुनिको काम, पेट्रोलियम पदार्थको प्रशोधन लगायतका क्षेत्रका काममा लगाउँदा उनीहरुको मृत्यु र अंगभंग हुने घटनाहरु भइरहेका छन् ।

त्यस्ता घटनाहरुको हालसम्म कुनै लेखाजोखा छैन । त्यस्ता घटनामा परेका नेपालीहरु अझै नेपालमा अभिशप्त जीवन बाँचिरहेका छन् । फेब्रुअरी १२, २०२० मा भएको उक्त घटना, जमिनमुनिको काममा अदक्षकामदारहरुलाई पर्याप्त सुरक्षाको व्यवस्था नगरी काममा लगाउँदा भएको हाम्रो ठहर छ । यस घटनाको अन्तर्राष्ट्रियतहबाट छानबिन गर्न, दोषी पक्षहरुलाई कार्वाही गर्न र यस घटनामा परेर मृत्यु र घाइते भएकाहरुको परिवारलाई उचित क्षतिपूर्ति दिलाउन साथै घाइतेहरुको पूर्णरुपमा स्वास्थ्य उपचार गराउन अन्तर्राष्ट्रिय समुदाय र अन्तर्राष्ट्रिय श्रमिक संगठन International Labour Organization संग हामी अपिल गर्दछौं । हामी मृतकहरुको आत्माको चिरशान्ति र घाइतेहरुको शीघ्र स्वास्थ्य लाभको कामना गर्दै हाम्रो अपिललाई अन्तर्राष्ट्रिय समुदाय समक्ष पुर्याउन सम्पूर्ण श्रमिक तथा न्यायप्रेमी जनसमुदायबाट ऐक्यबद्धता जनाउन अनुरोध समेत गर्दछौं ।

महेश श्रेष्ठ संयोजक नेपाली साझा मंच अन्तर्राष्ट्रिय समन्वय समिति