हामी सबैकाे संसारन्यूज

२० फागुन, काठमाण्डौं । चीनको वुहान हुँदै विश्वका ६४ बढी देशमा फैलिइरहेको कोरोना भाइरस (कोभिड–१९) का संक्रमणबाट बच्नका लागि सजगता अपनाउन भन्दै त्रिभुवन विमानस्थलले एक सूचना जारी गरेको छ ।

त्रिभुवन विमानस्थल नागरिक उड्डयन कार्यालयले कोरोना भाइरसको उच्च जोखिमलाई मध्यनजर गर्दै विमानस्थलमा विदेश जाने र आउनेहरुको स्वागत र विदाईका लागि यात्रुहरुका आफन्त तथा साथीभाईलाई विमानस्थलमा प्रवेश नर्गन अनुरोध गरेको छ ।

कार्यालयका महाप्रबन्धक देवेन्द्र केसीद्धारा सोमबार जारी विज्ञप्तिमा भनिएको छ‘ अन्त्राष्ट्रिय विमानस्थलमा आवत, जावत, गर्नुहुने सवै यात्रुलाई स्वागत तथा विदाई गर्न आउनुहुने सबै आफन्तजन लगायत अन्य महानुभवलाई अत्यावश्यक अवस्थामा बाहेक विमानस्थलमा प्रवेश नगरिदिनुहुन र अत्यावस्यक काममा आउनु परेमा सबैले मास्क प्रयोग गरिदिनुहुन अनुरोध छ ।’

त्यसैगरी विमानस्थलले अर्को व्यवस्था नहुन्जेलका लागि विमानस्थलबाट बाँडिने भिजिटर पास दिन पनि बन्द गरिएको सूचनामा जनाइएको छ ।