Sansar News
२३ फागुन, मोगादिशु । झाडापखालाका कारण सोमालियामा १४ जनाको मृत्यु भएको छ ।
एक जना क्षेत्रीय अधिकारीले बिहीबार दिएको जानकारीअनुसार उनीहरूको एक हप्ताको अन्तरालमा मृत्यु भएको हो ।
फोहोर पानीका कारण उनीहरूमा झाडापखाला लागेको र मृत्यु भएको हुनसक्ने बताइएको छ ।
सोमालियाका धेरै शहरहरू यस प्रकोपबाट प्रभावित भएको हिरशावेल राज्यका स्वास्थ्यमन्त्री अब्दी मुस्लिम महमदले पत्रकारहरूलाई बताए । “झाडापखालाको प्रकोप सबैभन्दा पहिले सोमालियाको मध्यभागमा पर्ने हिरान क्षेत्रको बेलेद नगरमा देखिएको हो,” उनले बताए ।
स्वास्थ्यमन्त्री महमदका अनुसार त्यसपछि मध्य सावेल क्षेत्रको जोभार नगरमा देखिएको र उनीहरूको मृत्यु भएको हो ।
सोमालियामा ठूलो बाढी आएपछि लगत्तै यो झाडापखालाको प्रकोप देखिएको अधिकारीहरूले बताएका छन् । यहाँका केही गाउँमा झाडापखालाको प्रकोप नै देखिएको छ ।
वि.सं.२०७६ फागुन २३ शुक्रवार ०८:२८ मा प्रकाशित
