हामी सबैकाे संसारन्यूज

२८ फागुन, काठमाडौं । सरकारले बोलाएको सर्वदलीय बैठक सम्पन्न भएको छ । कोरोना भाइरसको संक्रमणविरुद्ध लड्ने विषयमा छलफल गर्न उपप्रधान एवं रक्षामन्त्री ईश्वर पोखरेल सर्वलीय बैठकको आब्हान गरेका थिए । बैठकमा कोरोना भाइरसको संक्रमण भित्रिन नदिन भइरहेको प्रयास र भावी रणनीतिबारे छलफल भएको थियो ।

बुधबार सिंहदरबारस्थित प्रधानमन्त्री कार्यालयमा बसेको   बैठकमा कोरोना भाइरस संक्रमणको सम्भावनालाई ख्याल गरेर अगाडि बढ्न नेताहरुले सरकारलाई सुझाव दिएका थिए ।

समन्वयात्मक ढंगले सूचना सम्प्रेसण गर्ने र स्वास्थ्य संस्थाहरूलाई पनि यही बेलामा सक्षम बनाएर लैजाने लगायतका सुझाव प्राप्त भएको पोखरेलले बताए ।

सरकारको तयारी र कामको विषयलाई सबै दललाई जानकारी गराईएको थियो । बैठकमा नेकपा अध्यक्ष एवं पूर्वप्रधानमन्त्री पुष्पकमल दाहाल प्रचण्ड, नेता माधवकुमार नेपाल र सुवास नेम्वाङ लगायत सहभागी थिए।

प्रमुख प्रतिपक्षी दल नेपाली कांग्रेसका तर्फबाट संसदीय दलका मुख्य सचेतक बालकृष्ण खाण, नेता गगन थापा लगायत सहभागी भएका थिए। त्यसैगरी गृहमन्त्री रामबहादुर थापा, अर्थ मन्त्री युवराज खतिवडा, संस्कृति मन्त्री योगेश भट्टराई, उद्दोग मन्त्री लेखराज भट्ट, स्वस्थ्यमन्त्री भानुभक्त ढकाललगायतको उपस्थिति रहेको छ ।