हामी सबैकाे संसारन्यूज

विश्वभर नोबेल कोरोना भाइरसको बढ्दो संक्रमण बढीरहेका बेला कुवेतस्थित नेपाली दूतावासले कुवेतमा कार्यरत नेपालीलाई आधारहिन समाचारका पछि नलाग्न अनुरोध गरेको छ ।

दूतावासले सूचना जारी गर्दै कोरोना भाइरसको संक्रमण, रोकथामका उपायहरु, सर्तकता एवम् अपनाउनु पर्ने पूर्व सावधानीका उपायहरुबारे आधिकारीक निकायबाट जारी हुने सूचना बाहेक अन्य आधारहिन समाचारका पछि नलाग्न अनुरोध गरेको हो ।

त्यस्तै  कुवेत सरकारले २७ फ्रेबुअरी २०२० र सो मिति पश्चात भ्रमणबाट कुवेत फर्किएका, कुवेतमा काम गर्ने सबै आप्रवासीहरुलाई आफ्नो सिभिल आईडी र राहदानी सहित अनिवार्य उपस्थित हुन सूचित गरेको कुरा पनि दूतावासद्वारा सूचनामा जनाइएको छ ।

उक्त सूचनामा कोरोना रोकथाम तथा पूर्व तयारीका लागि कुवेत सरकारले लागू गरेका व्यवस्था बारे पनि जानकारी गराइएको छ । दूतावासले कुवतेमा कोरोना भाइरसबाट प्रभावितको संख्या ७२ पुगेको, २ जना निको भई घर फर्केको, ५ जना आईसीयुमा रहेको र १ जनाको अवस्था गम्भिर रहेको तर कसैको पनि मृत्यु नभएको जानकारी गराएको छ ।  कुवेत सरकारले विदेशीहरुलाई कुवेत प्रवेशमा रोक लगाउँदै सबै प्रकारका नयाँ प्रवेश र भ्रमण भिषा जारी गर्ने काम हालका लागि बन्द गरेको सूचनामा छ ।

कुवेत प्रवेश गर्नेहरुलई १४ दिन निश्चित स्थानमा व्यवस्था गरिएको क्वारेन्टाइनमा अनिवार्य बस्नुपर्ने व्यवस्था गरिएको छ भने सबै शैक्षिक संस्थाहरु, थप दुई हप्ताका लागि बन्द गरिएको छ । त्यसैगरी बढी भिडभाड हुने थिएटर, सिनेमा हल, विवाह केन्द्रहरु पनि बन्द गरिएको उल्लेख छ ।