हामी सबैकाे संसारन्यूज

२९ फागुन, काठमाण्डौं । कोरोना भाइरसको त्रास र त्यसको संक्रमणबाट बच्नका लागि कुवेतले पनि हर सम्भव प्रयास तथा तयारी सुरु गरेको छ ।

कुवेतले आजदेखी २६ मार्च सम्म (दुई हप्ताका लागि) सम्पूर्ण सरकारी कार्यालय बन्द गरेको छ । साथै भोली (१३ मार्च मध्यरात) देखि अर्को सूचना प्रकाशित नभएसम्मका लागि (कुवेती नागरिकको उद्धार गर्ने प्रयोजन बाहेक) कुवेत अन्तराष्ट्रिय विमानस्थलबाट हुने सम्पूर्ण व्यवसायिक हवाई उडान बन्द गरिएको दूतावासले जनाएको छ । साथै कार्गो सम्बन्धी सेवा प्रदान गर्ने हवाइ उडान तथा कार्गो पानीजहान यथावतरुपमा संचालन हुने बताइएको छ ।

त्यसैगरी कुवेत बैंकिङ एसोसियसनले अत्यावस्यक काम गर्न तोकिएका केही शाखाबाहेक सबै बैंक बन्द गर्ने निर्णय गरेको छ । बैंकहरु बन्द गरिएता पनि अनलाइन बैंकिङ सेवा र एटिएम सेवा भने संचालनमा रहनेछन् ।

यसैबीच खाद्यान्न अभाव हुन नदिनका लागि कुवेत सरकारले विभिन्न उपाय गर्ने सूचना पनि जारी गरेको छ । साथै कोरोना भाइरसका बारेमा आधारहिन हल्ला फैलाउनेलाई कानुनी कारबाही हुन सक्ने भएकाले यस्ता कार्यसमा संलग्न नहुन पनि अनुरोध गरिएको दूतावासले जनाएको छ ।