हामी सबैकाे संसारन्यूज

११ चैत, काठमाण्डौं । सरकारले कोरोना भाइरस (कोभिड १९) को संक्रमण रोकथाम र नियन्त्रणका लागि आज चैत ११ देखि चैत २१ गतेसम्म देशैभरी लक डाउन गरेको छ ।

लकडाउनका बेला सर्वसाधारणमा आइपर्ने समस्यालाई मध्येनजर गर्दै काठमाण्डौं महानगरपालिकाले जनप्रतिधिहरु (मेयर/उपमेयर र वडा अध्यक्षहरु) लगायतको सम्पर्क नम्बर दिएको छ ।

महानरपालिकाले महानगरका सर्वसाधारणलाई समस्या परेमा जनप्रतिनिधिहरुलाई फोन गर्न अनुरोध समेत गरेको छ ।
त्यसैगरी महानगरले यसअघि नै टोल फ्रि नम्बर सार्वजनिक गरेको थियो । २४ सै घण्टा संचालन हुने उक्त टोल फ्रि सेवाको नम्बर ११८० रहेको छ । उक्त नम्बरमा फोन गरेर खबर तथा सूचना दिन पनि अनुरोध गरेको छ ।

त्यस्तै कसैलाई कोरोना संक्रमणको शंका लागेमा तत्काल जनप्रतिनिधिहरुलाई फोन गरेर जानकारी गराउन सकिने बताउँदै त्यसका लागि महानगरको सहयोगमा संचालन गरिएको एम्बुलेन्स सेवा १०२ लाई जनशक्ति र स्वास्थ्य सामाग्रीसहित तयारी अवस्थामा रहेको समेत जानकारी दिएको छ ।

महानगरले कोरोना भाइरस संक्रमण तथा रोकथामका लागि आजदेखि सुरु गरिएको लकडाउनको नियम पालना गरेर सहयोग गर्न पनि सर्वसाधारणमा अनुरोध गरेको छ ।