हामी सबैकाे संसारन्यूज

२५ चैत, काठमाण्डौं । नेपाल कम्युनिष्ट पार्टी (नेकपा) को केन्द्रीय सचिवालयको बैठक सम्पन्न भएको छ ।
प्रधानमन्त्री निवास बालुवाटारमा पार्टीका अध्यक्षद्धय केपी ओली र पुष्पकमल दाहाल ‘प्रचण्ड’को संयुक्त अध्यक्षतामा बसेको सचिवालयको बैठकले विभिन्न विषयमा छलफल गरेको छ ।

नेकपाका प्रवक्ता नारायणकाजी श्रेष्ठका अनुसार उक्त बैठकमा प्रधानमन्त्री एवं पार्टीका अध्यक्ष केपी ओलीले कोभिड १९ को रोकथाम, नियन्त्रण र उपचारमा सरकार राज्यका विभिन्न निकायले गरेका प्रयास र हासिल भएका उपलब्धिका बारेमा जानकारी गराएका थिए ।

बैठकमा सचिवालय सदस्य, उपप्रधान तथा रक्षामन्त्री एवं उच्चस्तरीय निर्देशन समितिका संयोजक ईश्वर पोखरेलले कोरोना भाइरसको संक्रमणको समस्याले उत्पन्न स्थितिको सामना गर्न चालिएका कदम र गरिएको कामहरूको विस्तृत जानकारी गराएका थिए ।

बैठकमा सचिवालयका सबै सदस्यहरूले कोभिड-१९ नियन्त्रण, रोकथाम र उपचारका सम्बन्धमा आआफ्ना महत्वपूर्ण धारणा राख्दै सरकारले चालेका कदम र लिएका नीति सही नै रहेको र अझ प्रभाकारी रूपमा अघि बढ्न आवश्यक सुझावहरू राखेका थिए ।

उनीहरुले बैठकमा प्रस्तुत गरेका सुझावहरूलाई अझ प्रभावकारी रूपमा कार्यान्वयन गर्न पनि बैठकमा जोड दिएका थिए भने प्राप्त सुझावहरूलाई आवश्यकताको आधारमा कार्यान्वयनमा ध्यान दिनेगरी अध्यक्ष ओलीले आश्वस्त पारेका थिए ।