हामी सबैकाे संसारन्यूज

गणतन्त्र पनि नयातन्त्र रहेन अब
‘सर्वहारापार्टी’ मा टालैटाला देख्छु
मयूर बन्नखोज्ने काग रे त ।
विकासको डोजरले कच्याककुचुक पारिगयो
धनबहादुरको छाप्रो
हरिकिसन रामले
चप्पलमा नयाँ तुना फेर्न सकेन
कसले सुनायो यस्तो झूट खबर तिमीलाई
नयाँवर्ष आउँदैछ भनेर ?
बारी बेची
मान्छेपसलेलाई पैसा खुवाएर उडेको
‘पेम्बा दोर्जे लामा’ ट्याग टाँसेको
काठको बाकस कुर्दै
आकाश नियाल्दै छ उसको बूढो बाबु
धारा छोएको ‘अपराध’ मा
भर्खरै करङ गुमाइछे सुन्तली दमिनीले
इस्कूलबाटै बेपत्ता भएकी सान्नानीको फ्रक
बनमाराको झ्याङमा भेटिएछ

कसले सुनाउँदैछ यो झुट हल्ला
नयाँ वर्ष आयो भनेर ।
घुर्दै लत्रिएको मेरो माननीयको टाउको
मुस्किलले थेगिरहेछ सदनको थोत्रो बेन्चले
हजार राजकुमारको खान्गी थेग्न सक्तिन भन्दै
थैली टकटक्याइसक्यो पैसामन्त्रीले
फाटेको झोला लिएर
साहूसँग समृद्धिको सातु माग्न
पोहर उता गएजस्तै
अहिले यता गएको साहिँलो
फर्कियो भर्खरै
रित्ता सपना बोकेर
ऊ हेर त,
मेरो न्यामूर्ति
हात पसार्दैछ टेबुलमुनिबाट
राणकालदेखि जमेको फोहर
कटकटिएको छ अझै
सिंहदरबारको कुर्सीमा
नपत्याए साछी छ
भूकम्पले धूलिसात् भएको धरहरा
सत्य हजूर ! नझुक्किऊँ है !
हल्ला हो फगत हल्ला
नयाँवर्षको !!!
२०७४। चैत्र २६
हात्तीवन, ललितपुर