हामी सबैकाे संसारन्यूज

३ बैशाख, कतार । विश्वव्यापी महामारीको रुपमा फैलिएको कोरोना भाइरसको संक्रमण कतारमा पनि तिब्रगतिमा फैलिइरहेको छ ।

कतारमा पछिल्लो २४ घण्टामा मात्रै २८३ जना नयाँ संक्रमितको पहिचान भएको हो ।  नेपाली दूतावास कतारले कतारमा नेपालीहरु पनि संक्रमित भएको तर उनीहरुकै आग्रह बमोजिम यससम्बन्धी जानकारी सार्वजनिक नगरिएको बताएको छ ।

‘संक्रमित व्यक्तिले चाहेमा परिवार, आफन्त वा राजदूतावाससँग सम्पर्क गरी जानकारी दिन सक्नुहुनेछ,’ दूतावासद्धारा बुधबार जारी सूचनामा भनिएको छ,‘ यसै क्रममा उक्त भाइरसबाट संक्रमित केही नेपालीहरू राजदूतावासको सम्पर्कमा हुनुहुन्छ । वहॉंहरूको स्वास्थ्यमा जटिलता नरहेको र सुधारोन्मुख रहेको छ । वहॉंहरूकै आग्रहबमोजिम यससम्बन्धी जानकारी सार्वजनिक गर्न नसकिने व्यहोरा समेत सबैमा अनुरोध छ ।’

कतार सरकारले संक्रमणको रोकथाम, पहिचान र उपचारमा कतारी र आप्रवासी बिचमा बिना कुनै भेदभाव व्यवहार गरिने र संक्रमितको निःशुल्क उपचार गरिने जनाएको र सोही अनुरूप भईरहेको पनि दूतावासले जनाएको छ । कतार सरकारले कोभिड १९ को संक्रमणबाट उपचारार्थ संक्रमितहरूको देशगत वा समुदायगत जानकारी उपलब्ध नगराउने नीति लिएको समेत दूतावासले जानकारी दिएको छ ।

कतारको स्वास्थ्य मन्त्रालयका अनुसार कतारमा आज (बुधबार) सम्म ५४ हजार ४८४ जनामा कोरोना भाइरसको परीक्षण गरिएको छ (जसमा आज १८६२ जनामा परीक्षण गरिएको हो) ।

कतारमा हालसम्म संक्रमितको संख्या ३ हजार ७११ पुगेको छ भने मृतकको संख्या ७ रहेको छ ।
त्यसैगरी स्वास्थ्यलाभ गरेर फर्कनेको संख्या ४०६ पुगेको छ । पछिल्लो २४ घण्टामा ३३ जनाले स्वास्थ्य लाभ गरेको बताइएको छ ।

कतारका कम्पनीहरुले दिए नेपाली कामदारलाई बासस्थान छोड्न दवाव !