हामी सबैकाे संसारन्यूज

ए देशका आम नागरिकहरू हो
चिनेका छौ मलाई ?
म देश दाउमा राखी
राजनीति खेल खेल्ने
हुँ एक चतुर खेलाडी

मेरो स्वार्थ पूरागर्न
आफू बलियो हुन
जेपनि गर्न सक्छु
झगडा गर्न सक्छु
मान्छे कुट्न सक्छु
चोरी डकैती गर्न सक्छु
अपहरण, हत्या र हिंसा सबै गर्न सक्छु
किनभने
म देश दाउमा राखी
राजनीति खेल खेल्ने
हुँ एक चतुर खेलाडी

मलाई मान अपमानले छुदैन
धृणा र प्रेमले कुनै असर गर्दैन
मेरो स्वार्थ पूरा गर्न
आफू बलियो हुन
जेपनि गर्न सक्छु
लाज पचाउन सक्छु
लम्पसार पर्न सक्छु
स्वाभिमान बेच्न सक्छु
संस्कार त्याग्न सक्छु
म आफ्नै आमाको कोखमा
लात मार्न सक्छु
किनभने
म देश दाउमा राखी
राजनीति खेल खेल्ने
हुँ एक चतुर खेलाडी

फरक छ तिमी र म मा
तिमी मेरा कृत्यलाई
सोच्नै नसकिने कुकर्म ठान्छौ
म यसलाई स्वाभाविक कर्म ठान्छु
तिमी मेरो कर्मलाई अधर्म मान्छौ
म यसलाई मेरो धर्म मान्छु
तिमी यसलाई शर्म मान्छौ
म यसलाई गर्व ठान्छु
किनभने
म देश दाउमा राखी
राजनीति खेल खेल्ने
हुँ एक चतुर खेलाडी

मलाई थाहा छ
तिमी मलाई अपार घृणा गर्छौ
धृणाको समुन्द्रमा
आनन्दले पौडिदै जब म
चुनावमा भोट माग्न
तिमी सामु पुग्छु
आकाश पाताल जोडछु
तिम्रा संवेदनालाई छुन्छु
सपनाको चकलेट बाड्छु
ङिच्च दाँत देखाउदै
नमस्कार गर्छु
केही भरौटेलाई
चारा छर्छु, केहीँलाई दाह्रा धस्छु
साम नाम दण्ड भेद
सबै बराबर प्रयोग गर्छु
र विजयी हुन्छु अत्याधिक मतले
किनभने
म देश दाउमा राखी
राजनीति खेल खेल्ने
हुँ एक चतुर खेलाडी ।