हामी सबैकाे संसारन्यूज

१५ बैशाख, मकाउ । मकाउमा रहेका नेपालीहरुमा भैपरी आउने समस्यामा सहयोग गर्नका लागि सुदर्शन थापाको अध्यक्षतामा ‘नेपाली सहयोगी हात’ नामक कल्याणकारी कोष स्थापना भएको छ ।

उदय वाग्लेको अध्यक्षता तथा व्यवसायी, समाजसेवी, बुद्धिजीवी, गैरआवासीय नेपाली संघका पूर्वआइसीसी सदस्य, पूर्वएनआरएन अध्यक्ष र सदस्य लगायत मकाउमा कार्यरत नेपाली समुदायहरुको उपस्थितिमा बसेको बैठकले ‘नेपाली सहयोगी हात’ को स्थापना गरेको हो ।

सो संस्थाको कोषको संचालक समिति निर्देशक उदय वाग्ले रहेका छन् भने अध्यक्ष सुदर्शन थापा मगर, महासचिव रमेश अधिकारी, कोषाध्यक्ष शम्सेर थापा मगर, सहकोषाध्यक्ष सन्जीव कोयी र संयोजक निर्मला थापा मगर रहेकी छन् ।

मकाउमा नेपाली समुदायभित्र आकस्मिक भैपरी आउने संकटबाट सहयोग तथा उद्धारका लागि आपतकालीन उद्धार टोली समेत चयन गरिएको छ । जसमा मान बहादुर श्रेष्ठ, माईला विक, प्रेम विक, दीपक थापा र रोजन लामाको टोली रहेका छन् ।

त्यसैगरी कल्याणकारी कोषको अर्को बैठकमा निर्णय गर्ने गरी मिडिया, महिला सञ्जाल, संस्कृति महोत्सव र खेलहरू र सदस्यताको विषयमा छलफल गरेर समिति विस्तार गर्ने बताइएको छ । साथै कल्याणकारी कोषले मिडिया पार्टनरका रुपमा हिमाली संचार डटकमलाई राख्ने निर्णय समेत गरेको छ ।

कोषले नेपाली समुदायवीचको भाईचारा अभिवृद्धि तथा सद्भावको लागि आगामी मे ३१ तारीख आइतबार व्याडमिन्टन र बुद्धिचाल खेल समेत आयोजना गर्ने निर्णय गरेको छ ।

खेल हुने स्थान र पुरस्कारको विषयमा आगामी बैठकद्धारा निर्णय गरेर जानकारी गरिने नवगठित कोषका अध्यक्ष थापाले जानकारी दिएका छन् ।

सोहि अवसरमा संचालक समितिका निर्देशक उदय वाग्लेले कल्याणकारी कोषका लागि मकाउ डलर मोप. १० हजार कोषाध्यक्ष शम्सेर थापालाई हस्तान्तरण गर्दै कल्याणकारी कोषमा रकम जम्मा गरेर शुभारम्भ समेत गरेका छन् ।

निर्देशक वाग्लेले १० हजार सर्जिकल माक्स र १० थान सेनिटाइजर समितिमा हस्तान्तरण गर्ने घोषणा समेत गरेका छन् । उक्त सामग्री मकाउमा रहेका नेपाली समुदायका लागि वितरण गरिने पनि कोषले जनाएको छ ।

निर्देशक वाग्ले मकाउ र चीनमा विगत लामो समयदेखि व्यापार, व्यावसाय गर्दै आएका छन् । समाजसेवी समेत रहेका वाग्ले नेपाली समुदायका अगुवाका रुपमा परिचिति छन् ।