हामी सबैकाे संसारन्यूज

१७ वैशाख, काठमाडौं । सत्तारुढ नेपाल कम्युनिस्ट पार्टी (नेकपा) को सचिवालय बैठकमा प्रधानमन्त्रीको राजिनामा मागिएको स्रोतले बताएको छ ।

सचिवालय सदस्य तथा प्रवक्ता नारायणकाजी श्रेष्ठका अनुसार २० गते अर्को बैठक बोलाइएको छ । पार्टी अध्यक्ष एवं प्रधानमन्त्री केपी शर्मा ओली र अर्का अध्यक्ष पुष्पकमल दाहाल ‘प्रचण्ड’ को संयुक्त अध्यक्षतामा बालुवाटारमा बसेको सचिवालय बैठक आज बुधवार बसेर साढे ३ घण्टासम्म चलेको थियो ।

प्रवक्ता श्रेष्ठका  अनुसार बैठकमा पार्टीको आन्तरिक एकताको सुदृढीकरण, सरकारका काम कारबाही, स्थायी समितिको बैठकलगायत विभिन्न विषयहरूमा गहन छलफल भएको थियो भने सबै सदस्यहरूले आ–आफ्ना धारणाहरू राखेका थिए ।

बैठकले आन्तरिक छलफल र सरसल्लाह जारी राख्दै आगामी बैशाख २० गते पार्टी सचिवालयको बैठक बस्ने निर्णय गरेको प्रवक्ता श्रेष्ठद्वारा जारी विज्ञप्तीमा जनाइएको छ ।

नेकपा स्रोतका अनुसार बैठकमा प्रधानमन्त्री केपी शर्मा ओली र अध्यक्ष प्रचण्डसहित माधव नेपाल लगायतको अडान कायमै रहेको कारण बैठक निष्कर्षमा पुग्न नसकेको हो । स्रोतका अनुसार सचिवालयको बैठक चलिरहँदा ओलि पक्षीय सांसदहरुको चहलपहल निवास परिसरमै व्यापक रहेकोले स्थिति थोरै तनाबपूर्ण बनेको थियो ।

सो स्रोतका अनुसार बैठकमा प्रचण्ड र माधव नेपाल सहित सचिवालयका सदस्यले प्रधानमन्त्री र पार्टी अध्यक्षबाट ओलीले राजीनामा दिनुपर्ने मागसहित तत्काल स्थायी समिति बोलाउने विषयमा पनि धारणा राखेका थिए । तर ओली भने राजीनामा नदिने र स्थायी कमिटी पनि नबोलाउने पक्षमा रहेका थिए ।

दुई पक्ष आ–आफ्नै अडानमा टसमस बनेपछि वैशाख २० गते फेरि सचिवालय बैठक बस्नेगरी बुधबारको बैठक सकिएको बताइएको छ । यद्यपी नेता ईश्वर पोखरेलले सरकारका कामको प्रतिरक्षा तथा पार्टी एकताका बाँकी काममा गृहकार्य गर्ने गरी २० गतेलाई सचिवालय बैठक सारिएको बताएका छन् ।