हामी सबैकाे संसारन्यूज

१
संसार घुमूँ जतासुकै, फर्कने गाउँकै कुना हुन्छ
त्यही कुनामा फर्काइरहने, चुम्बकी दिल थुना हुन्छ
स्वार्थले नजिक हुने भन्दा, गोहीका आँशुले रुने भन्दा
गाउँकी मैयाँ सरल कति, मायाप्रीति नमूना हुन्छ ।

(२

पसिना बगाई बर्षभरी, खानै नपुग्ने तानोमा छ
कोल्टे फेरोस समयले, तर नफेरिने पानोमा छ
विवश छ कति धराभित्र,परम्पराको मखराभित्र
कति नारीको जिन्दगानी, अझै पनि अचानोमा छ ।

(३

नियम मिच्न जानेपछि, तालुमा आलु फल्दो रैछ
पहुँच हुँदा जेजे गरून्, गजबसित चल्दो रैछ
फाइदाका कदम चाली, बर्षौं गर हालीमुहाली
कब्जै गरोस् विश्व तर, तानाशाही ढल्दो रैछ ।

(४

सुनको थालमा हिरा पस्की, तिमीले पनि खान्नौ होला
कमाएको सम्पत्ति सब, जाँदा कुम्ल्याई लान्नौ होला
बन्छौ अझ न्यायको मूर्ति, देखाएर धनको फूर्ति
धनमै कसूर लुकाएर, जिउँदै स्वर्ग जान्नौ होला ।

(५

कसम खान्छ उसैले जो, सबैभन्दा झुट छ हजुर
भित्र बाहिर कुरा मिले, जे गरे नि छुट छ हजुर
आफै उत्पात गनाएर, जनता भेँडो बनाएर
देशै बेची खान्छन् यहाँ, सारा ब्रह्मलुट छ हजुर ।