हामी सबैकाे संसारन्यूज

जब भाइभाइमा
अहंकार र दम्भले घर हल्लिन्थ्यो
तब आमाले ग्रह बिग्रेको भन्दै
थरि थरिका ज्योतिषलाई हेराउन जान्थिन्
र, भन्थिन्-
छ महिनादेखिको मृत्यु योग,
अझै दुई वर्षभन्दा बढिनै चलिरहन्छ रे !
रिस खिच्न सक्नुपर्छ नत्र, अनिष्ट हुन्छ रे !
यसै भनी भनी,
दाइ र भाइको दम्भ मत्थर पाथ्र्यौ नि, आमा
जाऊ !
ती ज्योतिष अहिले कहाँ छन्
मानव जातिको ग्रह दशा, आयू सोधेर आऊ

भाउजू र दिदीलाई
बाहिरि हावाले आक्रमण गर्न सक्दैन भनी भनी
भय रहित बुटी बनाएर ल्याउँथ्यौ आमा
जाऊ !
ती वैद्य अहिले कहाँ छन्
कोभिड १९ ले नछुने बुटी बनाएर ल्याऊ

सारा विज्ञान यतिखेर पराजित भयो
मान्छेको चेतना विवेक लकडाउन छ
मस्तिष्क भरी भाइरस पसेर
स्यानिटाइज गरिरहेको छ मान्छेले
सर्वोत्कृष्ट आफ्नो चेतनाले अब,
कोरोना विरुद्धको औषधी आविष्कार
कहिले गर्छ आमा,
जाऊ !
तिम्रो ज्योतिष कहाँ सोधेर आऊ !

विकाशको चरम चुलिमा पुगेको मान्छेले
दम्भ अहंकार मत्थर पार्ने
नयाँ उपकरण बनाउँछ कि बनाउँदैन
मान्छेले मान्छेको अस्तित्व च्यूत गर्ने खेल
अझै कहिलेसम्म खेलिरहन्छ आमा,
जाऊ !
तिम्रो ज्योतिष कहाँ सोधेर आऊ !

आमा !
तिमीले रातोदिन पुजेको,
आस्थाको ईश्वर अफवाह भयो
तिम्रो चातुर्यता निकम्मा भयो
विज्ञान आफै सेल्फ आइसोलेसनमा छ
यतिखेर,
तिमीले पनि तिम्रो ईश्वर राम्रोसँग चिन्यौ
सबै बुझ्यौ र मौन छौ आमा !
यानिकि !
अहिले तिमी लक डाउनमा छौ