हामी सबैकाे संसारन्यूज

दुखःहरुको जुलूस निस्केको छ
पीडाहरु साथ दिंदैछन्
भय, त्रास र सन्त्रासहरु पनि
चूपचाप सामेल भएका छन् जुलूसमा
असिम बेदना नारा लगाइरहेको छ
सडकभरि छताछुल्ल छन्
आँसुका भेलहरु !

रोदनोत्सवमा छन्
दमकलहरु
एम्वुलेन्सहरु
अस्पतालहरु
वीसौं शताब्दिको मध्यान्ह
पूर्ण खग्रासले ढाकेको छ
कहाँ पुग्ने यो जुलूस
निस्पट्ट अँध्यारो सुरुङबाट ?

भक्तहरु विना
पुजारीहरु विना
आशौच मुद्रामा छन्
मन्दिरहरु, मूर्तिहरु !
सुकेका छन् खङ्ग्रङ्गै
फूल प्रसादहरु
सन्नाटाको झूल भित्र गुन्जिरहेछ
शोकधूनको निरसिलो सङ्गीत ।

विहानीको स्वच्छ सिर्सिरे वतासले ब्यूँझदा
म देख्दछु
होश हराएजस्ता खुशीहरु
विषालु नशाले लट्ठिएका आशाहरु
बेहोशीमा पोखिएर छरिएका सपनाहरु
हाच्छिउँ गरिरहेका जीजिविषाहरु
अहो ! अब सूर्योदयसँगै
जागृत हुनुपर्छ सबैसबै
फर्काउनुपर्छ हराएका होशहरुलाई
गाउनुपर्छ कोरसः
सम्भवामी युगेयुगे !

२२ अप्रिल २०२०
बृन्दावन, भारत ।