हामी सबैकाे संसारन्यूज

अहिले नेपालमा सरकार पक्ष, प्रतिपक्ष, नागरिक समाज, विद्यार्थी, युवा, संगितकला कर्मी लिपुलेक हुँदै भारत र चीन जोड्ने सडक निर्माणका कुराले जुर्मुराएको भान हुन्छ । नेपालको हामीले पढाएको नक्शा र सामाजिक सञ्जालमा देखिने लिम्पियाधुरासम्मको नक्शामा अन्तर छ । साविक नक्शामा कालापानीसम्मको मात्र हो कि जस्तो देखिन्छ ।

मलाई लाग्छ नेपालीले आफ्नो घरखेत तारबार गर्दा पनि चुच्चा चुच्ची छोडेर गर्ने अनि छिमेकीले थोरै यताउति गरे झगडा गर्ने चलन छ त्यस्तै देशको नक्शांकनमा पनि भएको हो कि ? होइन भने देशको नक्शा भन्दा परको बस्तीको जनगणना कसरी सम्भव थियो ? नेपाल भित्र तराई क्षेत्रमा जग्गाको कित्ताकाँट र नापी नक्शामा समस्या देखिन्छ । किनकी पहिला जग्गा फिट, धुरको खासै महत्व थिएन अहिले फिटफिटको हिसाब गर्दा पुरानो नापी मिल्दै मिल्दैन । लिपु लेकमा पनि त्यस्तै गरेर तल बसेर लिम्पियाधुरासम्मको नक्शांकन गर्दा कमि कमजोरी भयो कि ! जुन बेला त्यो सानो तान्द्रो अनुत्पादक क्षेत्र वास्ता गरेर वीर नेपालीले मन ठूलो बनायो ।

जब संसदको वजेट अधिवेशन शुरु भयो बाबुरामले लिपुलेकमा भारतले मानसरोवर जाने सडक बनाई उद्घाटन गरेको कुरा राखे अनि मुखले राष्ट्रवादी देखि अन्तर आत्मादेखि देशलाई माया गर्नेहरु जुर्मुराए । अहिले सडकदेखि संसदसम्म, युट्बदेखि टिभि च्यानलसम्म लिपुलेकको चर्चा छ ।

मलाई लागेको संसद नचलेको भए सरकारका र प्रतिपक्षका नेता के बोल्थे ? अनि बाबुरामले थाहा पाउने देशको रक्षाका जिम्मा लिनेले थाहा नपाउने के होला ? अनि वाबुरामले बोलेको हो रहेछ कि नाई सरकार पुष्टि गरेर अगाडि बढेको र अन्य बिरोधका स्वर आएका होलान् कि ? कागको कथा होला ?

जब चीन र भारतको बिचमा लिपुलेक हुँदै पारबहन सम्झौताको खवर आएको थियो र नेपाल जागेको थियो । त्यसैबेला सफल कुटनैतिक पहल किन नगरेको ? विवाह गर्दा यस्सो बिरोधमा उत्रेर छोड्ने अनि बच्चा जन्मेकोमा फेरि बिरोध ? नेपालका प्रचण्ड देखि केपी, देउवा, विप्लव, बाबुराम, महन्तसम्मका राजनैतिक दलपार्टी, सामाजिक अभियान्ता र युवा विद्यार्थी सबैले कसम खाएर देश ढिक्का बनाई भारत, चीन र आवश्यक परे अन्तर्राष्ट्रिय समुदायसँग छलफल गरि यो समस्या किनारा लगाई नयाँ नक्शा बनाउने, काँडेतार कामको थालनी गर्न जरुरी छ । फलाम तातेको बेलामा नपिटे आकार दिन सकिन्न । अर्काे बिषय झिकेर बिषयान्तर गर्न हुँदैन । हामी साना छदाँदेखि कालापानीबाट भारतीय सेना र ब्यारेक हटाउने कुराको आवाज सुन्दै र नारा लगाउँदै आएका हौं । त्यसैले चाहे महेन्द्रले बिगारेको होस्, चाहे यसभन्दा अगाडि सरकारले केही नगरेको होस् अब गर्नु प¥र्याे । सरकार बलियो छ कुनै लोभिपापीको प्रलोभनमा नपरी काम गर्नु सारा नेपालीको एक सुत्रीय काम बनेको छ, यति वेला ।