Sansar News
५ जेठ, बेल्जियम । बेल्जयममा रहेका सामाजिक अभियन्ता दामोदरप्रसाद आचार्यले नेपाल सरकारले लकडाउन खोल्न ढिलो नगरोस् भन्ने सुझाएका छन् ।
लुम्बिनी-कपिलवस्तु दिवस विश्व अभियानका युरोप सल्लाहकार तथा अभियानको बेल्जियम च्याप्टरका सभापति समेत रहेका आचार्यले सरकारले चिकित्सा क्षेत्रका विज्ञहरू र सूक्ष्मजीव विज्ञहरू संगको परामर्शमा संक्रमित धेरै भएका जिल्लालाई अति जोखीममा रेड जोन, संक्रमित थोरै भएका जिल्लालाई कम जोखीममा यलो जोन र संक्रमित नै नभएका जिल्लाहरूलाई ग्रीन जोनको रूपमा विभाजित गरेर जनताको जनजीवीकालाई सहज बनाउनका लागि लकडाउनलाई खुकुलो बनाऊन Exit Strategy को कार्यनीति अवलम्बन गर्नु जरूरी रहेको पनि उनले सुझाएका छन् ।
नेपालमा लकडाउनको अवधि जति थपियो संक्रमितको संख्या पनि त्यसरी बढेको बताउँदै लकडाउनलाई खुकुलो बनाउन र जनतालाई सर्तकता अपनाउन सुझाएका छन् । ‘लकडाउन खुकूलो गरेता पनि उचित तवरले मास्कको प्रयोग गर्न, सामाजिक दूरी पालना गर्न र स्यानिटाइजरको नियमित प्रयोग गर्न कसैले पनि बिर्सनु हुदैन ।’ उनले भनेका छन् ।
सामाजिक संजाल फेसबुकमा उनले भनेका छन्, ‘विश्वका विभिन्न देशमा लकडाउनको अवधि थपको विरोधमा प्रदर्शनहरू हुन थालेका छन् । अमेरिकाबाट सुरु भएको लकडाउन विरोधी प्रदर्शन जर्मनी, बेलायत हुदै पोल्यान्डसम्म विस्तार भएको छ । यस संदर्भमा नेपालले लकडाउन खुकूलो गर्ने रणनीति अबिलम्व लागु गर्नेतर्फ ध्यान पुर्याऊनु सान्दर्भिक हुन्छ ।’
लकडाउनका कारण जनताले कठोर परिश्रम र मेहनत गरेर उत्पादन गरेका अनाज, फलफूल र सागसब्जी बजारमा बिक्री वितरण गर्न असहज भएको र दूग्धजन्य पदार्थ आदिको बिक्री वितरणलाई समेत आघात पुगेको बताउँदै यी विषयमा सरकारको दृष्टि पुग्नुपर्ने समेत बताएका छन् । ‘अर्कोतर्फ नेपाल कृषि प्रधान देश भएको नाताले कृषकहरूको लागि आवश्यक पर्ने मलखाद र विउविजन खरिदको बजार ब्यवस्थाको सहजतातर्फ समेत सरकारको ध्यानाकर्षण हुनू जरूरी छ ।’ आचार्यले भनेका छन् ।
कोरोना संक्रमणका कारण नेपालमा दुई जनाको दुखद निधन भएको समाचार समेत सार्वजनिक भइसकेको अवस्थामा पनि आवश्यक स्वास्थ्य सामाग्रीहरूको अभावका कारण परिक्षणलाई अत्यधिक बढाउन नसकिएकोमा पनि आचार्यले दुःख व्यक्त गरेका छन् ।
वि.सं.२०७७ जेठ ५ सोमवार १४:३४ मा प्रकाशित
