हामी सबैकाे संसारन्यूज

ढलें म भोकले ढलें
सुकेको रुखझैं ढलें
समाजवाद हेर म
सामान्य भोकले ढलें !

मलाई मर्न मन थियो
लडेर भव्य युध्दमा
मलाई मिल्न मन थियो
प्रसान्त शान्त वुध्दमा !
मिलेन त्यो महा खुसी
म खेत बारीमा ढलें
मलर सदा म निम्छरो
सामान्य भोकले ढलें !

छ खेत बारी वन्जर
छ हातमा परिश्रम
छ सिप सिंचने धरा
छ सोचमा पराक्रम
छ खेत बारी किन्तु त्यो
म जोत्नबाट दूर छु
र छैन जोतको हक
म क्रोधबाट चुर छु
थिए अनन्त स्वप्न ती
बिसाई खेतमा ढलें
मलर सदा म निम्छरो
सामान्य भोकले ढलें !

थिएन मासु–भातले
अजिर्ण बन्ने कल्पना
थिएन मागी चोरी या
लुटेर खाने भावना
थियो त हात पाउ यी
बजारी खान पाऊँ म
थियो त आफ्नु दुखको
कमाई मात्र खाऊँ म
म हात पाउ खाली भै
चुलो चिसो बनी ढलें
मलर सदा म निम्छरो
सामान्य भोकले ढलें !