हामी सबैकाे संसारन्यूज

काठमाडौं । सत्तारुढ नेकपाभित्रको विवाद समाधानको लागि पार्टी अध्यक्षद्वय केपी शर्मा ओली र पुष्पकमल दाहालबीच आज पनि छलफल भएको छ ।

नेकपा पार्टी स्रोतले जनाएअनुसार अध्यक्षद्वयबीच प्रधानमन्त्री निवास बालुवाटारमा ‘वान टु वान’ वार्ता सुरु भएको हो । यसअघि सोमबार पनि अध्यक्षद्वयबीच पार्टी विवाद समाधानकै निम्ति वान टु वान वार्ता भएको थियो ।

जारी स्थायी समिति बैठकका दुई तिहाई स्थायी समिति सदस्यले प्रधानमन्त्री ओलीको दुवै पदबाट राजीनामा माग्ने तयारी भएसँगै नेकपाभित्र विवाद चुलिएको हो । यसबीच प्रधानमन्त्री ओलीले कुनै पनि पदबाट राजीनामा नदिने अडान लिँदै आएका छन् ।

तर, पछिल्ला भेटवार्तामा भने विवाद समाधानको लागि मध्यमार्गी बाटोको खोजी भईरहेको जनाइएको छ । जनाइएअनुसार पछिल्ला शीर्ष नेताहरु तथा अध्यक्षबीचको भेटवार्ता सकारात्मक हुँदै गएको छ ।