Sansar News
२३ असार, काठमाडौँ । सरकारले नेपाल प्रहरी को महानिरीक्षक (आईजीपी)मा अतिरिक्त महानिरीक्षक (एआईजी) शैलेश थापा क्षेत्रीलाई बढुवा गर्ने निर्णय गरेको छ ।
मंगलबारको मन्त्रिपरिषद् बैठकले वरीयतामा पहिलो नम्बरमा रहेका क्षेत्रीलाई महानिरीक्षकमा बढुवा गर्ने निर्णय गरेको हो ।
महानिरीक्षकको प्रतिस्पर्धामा एआईजी हरिबहादुर पाल पनि थिए । थापा र पाल एकै दिन सेवा प्रवेश गरेर बढुवामा पनि सँगसँगै थिए । उनीहरुबीचमा अस्वस्थ प्रतिस्पर्धा नभएको पनि बताइने गरिन्थ्यो ।
नेपाल प्रहरीको २८ औं महानिरीक्षक बनेका थापा २०४९ सालमा प्रहरी निरीक्षक (इन्सपेक्टर) को रुपमा सेवा प्रवेश गरेका थिए ।
नवनियुक्त महानिरीक्षक थापा हाल प्रहरी प्रधान कार्यालय मानवस्रोत तथा प्रशासन विभाग प्रमुखमा कार्यरत छन् । थापा २०७६ चैत ९ गते प्रहरी नायब महानिरीक्षक (डीआईजी)बाट एआईजीमा बढुवा भएका थिए । प्रहरीमा व्यवसायिकता विकासका लागि मूल्यांकनका आधारमा थापालाई नियुक्त गर्ने प्रस्ताव गरिएको गृहमन्त्री रामबहादुर थापा ‘बादल’को स्रोतले बताएको छ ।
वि.सं.२०७७ असार २३ मंगलवार २०:३२ मा प्रकाशित
