Sansar News
काठमाडौं । सत्तारुढ नेकपाभित्र चुलिएको विवादबारे अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीच भएको छलफल विना निष्कर्ष टुंगीएको छ । प्रधानमन्त्री निवास बालुवाटारमा झण्डै ३ घण्टासम्म चलेको छलफलमा कुनै निष्कर्ष निस्कन नसकेको नेकपा स्रोतले जनाएको छ ।
जनाइएअनुसार पार्टीभित्र देखापरेको विवादका बारेमा दुई नेताबीच विषय केन्द्रित छलफल भएको थियो । बुधबारको छलफलमा पार्टी महासचिव विष्णु पौडेल र स्थायी कमिटी सदस्य जनार्दन शर्मा पनि सहभागी भएको नेकपाले जनाएको छ ।
जनाइएअनुसार बिहिबार पुनः दुई नेताबीच छलफल हुनेछ । यसअघि मंगलबार पनि दुई नेताबीच एक घण्टा लामो छलफल भएको थियो ।
सत्तारुढ नेकपाभित्र विवाद चर्किएसँगै स्थायी कमिटी बैठक साउन २ सम्मको लागि स्थगित छ । विवाद बढ्दा शीर्ष नेताहरु बैठक नै रोकेर छलफलमा जुटेका थिए ।
गत असार १० गतेदेखि जारी स्थायी कमिटी बैठकमा प्रधानमन्त्री ओलीको राजीनामा मागिएसँगै विवाद उत्कर्षमा पुगेको थियो । नेकपाभित्रका प्रचण्ड–माधव समुहका ३० स्थायी समिति सदस्यले प्रधानमन्त्री ओलीको पार्टी अध्यक्ष र प्रधानमन्त्री दुवै पदबाट राजीनामा मागेका थिए ।
वि.सं.२०७७ असार ३१ बुधवार १६:०१ मा प्रकाशित
