हामी सबैकाे संसारन्यूज

३१ असार । सिरहाको कल्याणपुर नगरपालिकाको मेयर सूर्यनाथ मण्डलको छोरा सन्त मण्डल बुधबार दिउँसो ५ लाख रुपैयाँ घुस रकमसहित पक्राउ परेका छन् ।

मण्डललाई अख्तियार दुरुपयोग अनुसन्धान कार्यालय बर्दिवासको टोलीले लहान नगरपालिका २२ स्थित राजदेवी चोक नजिक एक निर्माणधिन पेट्रोल पम्पबाट कमिसन लेनदेन गरिरहेकै बेला मेयरका छोरा सन्त मण्डल सहित उनका साथी जितेन्द्र महतोलाई रङ्गेहात पक्राउ गरेको हो।

अख्तियार बर्दिवास कार्यालयको सूचना अधिकारी मणीराज ज्ञवालीका अनुसार अख्तियारको टोलीले दुवैजनालाई योजना डिपिआर गरेको भुक्तानी विषयमा सेवाग्रहीसँग घुस लिँदालिँदै समातिएका छन् ।

मेयर मण्डलले नगरपालिकाको डिपिआर गर्ने ब्यक्तिसँग भुक्तानी गरिदिए बापत ५ लाख रुपैयाँ घुस माग्दै आएको र सो रकम लिन मेयरले आफ्नो छोरा सन्त मण्डललाई लाहान पठाएको बुझिएको छ । अख्तियारका डिएसपी मधुकुमार थापाको नेतृत्वमा खटिएको टोलीले उनीहरुलाई घुस लिँदै गर्दा पक्राउ गरेको थियो।