हामी सबैकाे संसारन्यूज

हाम्रो लेख बनोस् सबै मनुजको,आँखा खुलाई दिने
हाम्रो लेख बनोस् सबै सुजनमा,सद्भाव राखी लिने
हाम्रो लेखन होस् सधैं सुरसिलो,सुन्दा मिलोस् राहत
लेखेको उपयोग गर्न नसके, लेखेर बेकार छ
. (१)
हाम्रो लेख सदैव ती श्रमिकका, आऊन् बनी साधक
हाम्रो लेख अदम्य साहस बनोस् ,केही नहोस् बाधक
हाम्रो लेखनले समस्त जनको, गर्दै रहोस् स्वागत
लेखेको रचना सुरम्य नबने, लेखेर बेकार छ
. (२)
हाम्रो लेखन होस् विशुद्धरितको, होस् सत्यको पक्षमा
हाम्रो लेखनको प्रभाव चुलिँदा, मान्छे पुगून् लक्ष्यमा
लेखौँ सत्य कुरा असत्य कहिल्यैे, टिक्दैन के काम छ
कालो हुन्छ अँगार लेख्न नसके, साहित्य बेकार छ
. (३)
लेखौँ राष्ट्रिय चाहना प्रगतिको, आधारका ती कुरा
लेखौँ लेख्न सकिन्छ जे जति यहाँ,सन्मार्गका आँकुरा
लेख्दा हीन कुभाव नाम नरहोस्, उत्साहले लेख्नु छ
दम्भी सोच लिएर लेख्दछ भने, त्यो लेख बेकार छ
. (४)
लेख्दा सत्य, बिरोध आउँछ भनी, लेख्दैन छट्टू कवि
लेखी छाड्छ परन्तु अड्चन कुनै, टेर्दैन सच्चा कवि
पाखण्डीपनको गुलाम नबनौँ, बिन्ती नमस्कार छ
आफ्नो सान, विवेक कुण्ठित भए, लेखेर बेकार छ
. (५)
( छन्द-शार्दूलविक्रीडित)