हामी सबैकाे संसारन्यूज

काठमाडौं । नेपालको पे टिभी उद्योगमा नेतृत्वदायी भूमिका निर्वाह गरेको डिशहोम मिडिया नेटवर्क लिमिटेडले साधारण शेयर (आईपीओ) जारी गर्ने भएको छ । कम्पनीले २३ करोड ८५ लाख ९२ हजार ९ सय रुपैयाँ बराबरको आईपीओ जारी गर्ने भएको हो ।

आईपीओ जारी गर्नको लागि कम्पनीले नेपाल धितोपत्र बोर्डमा आवेदन दिइसकेको छ । जनाइएअनुसार डिशहोमले असार ३० मा नै बोर्डमा आवेदन दिएको थियो ।

कम्पनीले अंकित मुल्य एक सय रुपैयाँको दरले २३ लाख ८५ हजार ९ सय २९ कित्ता सेयर निष्काशन गर्नेछ । उक्त शेयर निष्काशन तथा बिक्रीको जिम्मा कम्पनीले ग्लोबल आईएमई क्यापिटललाई दिएको छ ।

शेयर निष्कासनपछि कम्पनीको चुक्ता पूँजी दुई अर्ब २५ करोड पुग्नेछ । डिशहोमले गत आर्थिक वर्षमा २९ करोड २७ लाख ९५ हजार रुपैयाँको खुद नाफा कमाएको थियो भने चालु आर्थिक वर्षको ९ महिनामा मात्रै २८ करोड ३३ लाख ६९ हजार रुपैयाँ खुद नाफा गरेको छ ।

डाइरेक्ट टू होम (डीटीएच) प्रविधिमार्फत स्वेदशी तथा विदेशी च्यानलहरुलाई बिक्री गर्दै आएको डिशहोमले बजार निकै छिटो विस्तार गरेको छ ।