हामी सबैकाे संसारन्यूज

काठमाडौं । नेकपाका स्थायी समिति सदस्य एंव संस्कृति, पर्यटन तथा नागरिक उड्डयन मन्त्री योगेश भट्टराईले पार्टी गम्भिर दुर्घटना नजिक पुगेको बताएका छन् । सामाजिक सञ्जाल ट्विटरमार्फत पछिल्लो नेकपा विवादबारे बोल्दै भट्टराईले यस्तो कुरा खुलाएका हुन् ।

उनले सबैलाई रोकिएर गम्भीर छलफल तथा समिक्षा गर्न पनि आग्रह गरेका छन् । ‘दुर्घटना नजिक देखिन्छ, सबै रोकिऔं, सल्लाह गरौं’, भट्टराईले भनेका छन् ।

दुर्घटना नजिक देखिन्छ । सबै रोकिऔ । सल्लाहा गरौ ।

— Yogesh Bhattarai (@yogesbhattarai) July 28, 2020

नेकपा स्थायी समिति बैठक प्रधानमन्त्रीसमेत रहेका पार्टी अध्यक्ष केपी शर्मा ओलीले एकपक्षीय रुपमा स्थगित गराएसँगै नेकपाभित्रको विवाद गम्भीर चरणमा पुगेको छ । ओलीले बैठक स्थगित गराएसँगै अर्का अध्यक्ष पुष्पकमल दाहाल ‘प्रचण्ड’, वरिष्ठ नेता माधवकुमार नेपाल र झलनाथ खनाललगायतका नेताहरु छुट्टै बैठकको तयारीमा लागेका छन् ।

बालुवाटारमा अहिले नेताहरु बेग्ला बेग्लै छलफलमा व्यस्त छन् । नेकपा स्रोतले जनाएअनुसार दाहाल, खनाल र नेपाल समुह स्थायी समिति बैठक बोलाउने पक्षमा देखिएका छन् ।

यसबीचमा अध्यक्षद्वय ओली र दाहालबीच भएको भेटवार्ता सकारात्मक नभएको नेकपाका एक स्थायी समिति सदस्यले बताएका छन् ।