हामी सबैकाे संसारन्यूज

यी घर छोडी जानेहरुले
किन बिर्सिन्छन घर
किन फर्किदैनन
सम्झिएर घर
घरले कहाँ बिर्सिन्छ होला
घर बिर्सिनेहरुलाई
घरले कहाँ बिर्सिन्छ होला
घर नफर्किनेहरुलाई ।

यस्तो लाग्छ झारै झारले पुरिएर
अझै नपल्टिएर
उभिरहेका यी घरका भित्ताहरु
आज पनि प्रतीक्षामा छन
आज पनि पर्खाइमा छन
घर छोडी जाने परदेशीहरुको
सोच्दा हुन
कुनै दिन आएर फेरि
उसै गरि मुसार्ने छन
उसै गरि सजाउने छन
उसै गरि रंगाउने छन
घरका भित्ताहरु ।

के थाह
यी घरका भित्ताहरुलाई
पखेटा पलाएर उडने
सबै चराहरु
बेलुका गुँड फर्किदैनन भनेर
के फर्किन्छन होला
लेउ लागेका भित्ताहरु मुसार्न
उडाएका छानाहरु छाउन
उम्रेका झारहरु उखाल्न
फेरि पनि खै किन
आउने जानेहरुको अनुहारमा
उकालो ओरालो गर्नेहरुको मुहारमा
यी घरका भित्ताहरुले
आफ्नै घर धनी
खोजे जस्तो लाग्छ
आफ्नै घर धनी
कुरे जस्तो लाग्छ ।

यी घर छोडी जानेहरुले
किन बिर्सिन्छन घर
किन फर्किदैनन
सम्झिएर घर
घरले कहाँ बिर्सिन्छ होला
घर बिर्सिनेहरुलाई
घरले कहाँ बिर्सिन्छ होला
घर नफर्किनेहरुलाई ।