हामी सबैकाे संसारन्यूज

१९ साउन, बाँके । बाँकेको नेपालगञ्ज उपमहानगरपालिकाका कार्यकारी अधिकृत र एक जना वडाध्यक्षलाई कोरोना भाइरसको संक्रमण पुष्टि भएको छ ।

भेरी अस्पताल नेपालगन्जमा सोमबार गरिएको कोरोना परीक्षणमा उपमहानगरपालकिाका कार्यकारी अधिकृत र एक जना वडाध्यक्षलाई कोरोनाको संक्रमण पुष्टि भएको हो ।

जनस्वास्थ्य कार्यालयका कोरोना फोकल पर्सन नरेश श्रेष्ठका अनुसार उपमहानगरपालिकाका जनप्रतिनिधि र कर्मचारी गरी ५४ जनाको स्वाब संकलन गरेर परीक्षण गरिएकोमा ती मध्ये दुई जनामा कोरोनाको संक्रमण पुष्टि भएको हो ।

संक्रमण पुष्टि भएका दुवै जनालाई खजुरास्थित क्यान्सर अस्पतालको आइसोलेसनमा पठाइएको फोकल पर्सन श्रेष्ठले बताए ।

पछिल्लो २४ घण्टामा १९५ जनाको पीसीआर विधिबाट परीक्षण गर्दा ९ जनामा भाइरस संक्रमण देखिएको भेरी अस्पतालले जनाएको छ ।

बाँकेमा अहिलेसम्म ४ सय ४६ जनामा कोरोनाको संक्रमण पुष्टि भएको छ । तीमध्ये ३ सय ८८ जना कोरोनालाई जितेर घर फर्किसकेका छन् ।