हामी सबैकाे संसारन्यूज

प्रवासी नेपाली एकता मंच साउदी अरबले विदेशमा असहाय बनेका नेपालीको उद्धारको दायित्व सरकारले नलिनु सरकारको गैरजिम्मेवारी भएको भन्दै खेद व्यक्त गरेको छ ।

अध्यक्ष शिवराज जैशी र सचिव राजु खनालद्वारा जारी विज्ञप्तिमा कोभड १९ को विश्वब्यापी महामारीका कारण रोजगारविहिन भएर फर्कने प्रतिक्षामा रहेका नेपालीहरुले पालना गर्नुपर्ने नियमहरुप्रति ध्यानाकर्षण भएको जनाउँदै सरकारले उक्त निर्णयप्रति खेद व्यक्त गरिएको छ ।
रोजगार गुमाएर बिखर्ची भएका असहाय श्रमिक नेपालीहरुको हवाई टिकट, लोकल यातायातको ब्यवस्थापन, क्वारेन्टाइन र पिसिआर परिक्षणसहितका सम्पूर्ण खर्च सरकारले ब्यहोर्न जोडदार रुपमा माग गर्दछौ, विज्ञप्तिमा भनिएको छ ।

साथै बिदेशमा बिखर्ची भएका आफ्ना नागरिक निःशुल्क स्वदेश ल्याउनु सरकारको दायित्व पनि हो भन्ने स्मरणसमेत गराइएको छ ।

यसैबीच सरकारले विदेशमा अलपत्र स्वदेश फर्किन सक्ने कुनै पनि आधार नभएका नागरिकहरुलाई भने सरकारी खर्चमा उद्धार गरिने र नेपालमा आएर होटल क्वारेन्टाइनमा बस्ने तथा पिसिआर खर्च पनि सरकारले व्यर्हाेने बताएको छ । पर्यटन, नागरिक उड्डयन तथा संस्कृति मन्त्री योगेश भट्टराईले मंगलबार सो कुराको जानकारी दिएका छन् ।