हामी सबैकाे संसारन्यूज

१७ भदौँ, काठमाडौ । सन्दिप लामिछाने आवद्ध टिम जमैका तलैवाज आफ्नो क्यारेबियन प्रिमियर लिग (सिपिएल) को सातौँ खेलमा ट्रिनबागो नाइट राइडर्ससँग १९ रनले पराजित भएको छ ।

टस हारेर पहिले ब्याटिङ्ग गरेका ट्रिनबागो नाइट राइडर्सले २० ओभरमा ४ विकेट गुमाउदैँ १८४ रन बनाएको थियो । ट्रिनबागो नाइट राइडर्सका लागि कोलिन मुनरो ५४ बलमा ६१ रनको विस्फोटक पारी खेलेका थिए । जमैकाका लागि बलिङ्गमा कार्लोस ब्रथवेट सर्वाधिक २ विकेट लिएका थिए ।

ट्रिनबागो नाइट राइडर्सले दिएको १८४ रनको लक्ष्य जमैकाले पुरै २० ओभर खेल्दा पनि पुरा गर्न सकेन । जमैकाले २० ओभरमा ६ विकेट गुमाएर १६५ रन मात्र बनाउन सक्यो ।

टिम पराजित भएता पनि सातौँ खेलमा पनि सन्दिपको प्रदशर्न भने राम्रो रहेको थियो । सन्दिपले आफ्नो ४ ओभरमा २० रन दिदैँ १ विकेट निकालेका थिए ।

त्यसैगरी आज बिहान भएको खेलमा गुयाना अमेजन वारियर्सले बार्बडोस ट्राईडेन्सलाई ८ विकेटले पराजित गरेको छ ।