हामी सबैकाे संसारन्यूज

काठमाडौं । मन्त्रिपरिषद पुनर्गठन तत्काल नहुने भएको छ । शुक्रबार बसेको मन्त्रिपरिषद बैठकमा प्रधानमन्त्रीसमेत रहेका नेकपा अध्यक्ष केपी शर्मा ओलीले पुनर्गठन हल्ला मात्रै भएको स्पष्ट पारेको बैठकमा सहभागी एक मन्त्रीले जानकारी दिएका छन् ।

शुक्रबारको बैठकमा प्रधानमन्त्री ओलीले सबै मन्त्रीहरुलाई ‘ढुक्क भएर काम गर्नुस’ भन्ने निर्देशन गरेका थिए । बैठकमा सहभागी एक मन्त्रीका अनुसार प्रधानमन्त्री ओलीले मन्त्रिपरिषद पुनर्गठन आफुँहरुविरुद्वको प्रचार मात्रै भएको टिप्पणी गरेका थिए ।

पार्टी विवाद समाधान गर्न गठित कार्यदलले सुझाव बुझाएसँगै मन्त्रिपरिषद पुनर्गठनको चर्चा चुलिएको थियो । यसअघि विभिन्न सञ्चारमाध्यमसँगको कुराकानीमा पनि ओलीले मन्त्रिपरिषद पुनर्गठनबारे योजना बनाईरहेको बताएका थिए ।

खतिवडाले मागे बिदाई

शुक्रबारको बैठकमा अर्थमन्त्री डा. युवराज खतिवाडले बिदाई मागेका थिए । उनले सरकार बाहिरै रहेर पनि सहयोग गर्न तयार रहेको कुरा राखेको जनाइएको छ । बैठकमा खतिवडाले आफ्नो कार्यकालमा गरेका कामहरुबारे ब्रिफिङ्ग गरेको बुझिएको छ ।

राष्ट्रिय सभा सदस्य रहेका खतिवडाको पदावधि भोली (शनिबार)देखि सकिँदैछ । उनको ठाउँमा पार्टी उपाध्यक्षसमेत रहेका नेता बामदेव गौतमलाई सिफारिस गर्ने निर्णय सत्तारुढ नेकपाले गरिसकेको छ ।

तर, बामदेवको नाम सिफारिस भएन

शुक्रबारको मन्त्रिपरिषद बैठकले पार्टी उपाध्यक्ष बामदेव गौतमलाई राष्ट्रिय सभामा सिफारिस गर्ने अपेक्षा गरिएको थियो । तर गौतमको नाम सिफारिस नगरी बैठक सकिएको छ ।

बिहिबारको सचिवालय बैठकले गौतमलाई राष्ट्रियसभामा पठाउने निर्णय गरेको थियो । यसअघि ०७६ फागन १४ मा बसेको सचिवालय बैठकले पनि उनलाई राष्ट्रिय सभा सदस्यको रुपमा सरकारले सिफारिस गर्ने सर्वसम्मत निर्णय गरेको थियो ।

तर, निर्णय गर्ने सबालमा प्रधानमन्त्रीसमेत रहेका ओलीले सहमतीय नजनाएसँगै निर्णय ओझेलमा पर्दै आएको थियो ।