Sansar News
२५ भदौ, काठमाडौं । ड्रग्स केसमा हिरासतमा लिएपछि १४ दिनको लागि जेलमा पठाईएकी भारतीय कलाकार रिया चक्रवर्तीले बुधबार पहिलो दिन दाल, भात खाएको र राति भुँइमा सुतेको बताइएको छ ।
नारकोटिक्स कन्ट्रोल व्युरो (एनसीबी) ले मंगलबार उनलाई पक्राउ गरेपछि तल्लो अदालतमा लगिएकी रियालाई अदालतले १४ दिनको न्यायिक हिरासतमा राख्न आदेश दिएपछि भायाखेल जेलमा लगिएको थियो ।
भारतीय संचारमाध्यका अनुसार रियाले जेलमा पुगेको पहिलो दिन जेलका कर्मचारीसँग मात्र कुरा गरेकी थिइन् । उनलाई दिउँसोको खानाका रुपमा भात, दाल र २ वटा रोटी तथा तरकारी दिइएको थियो । उनले दिउँसो जेलका कर्मचारीसँग पढ्नका लागि केही किताव समेत मागेकी थिइन् ।
श्रोतका अनुसार रिया रातमा राम्रोसँग निदाइनन् । रातिमा धेरैपटक उठेर बसेकी थिइन् । जेलभित्र उनलाई एक ब्लांकेट, सेतो तन्ना र डेंटल किट उपलब्ध गराइएको थियो ।
आफूले शुसान्तको लागि ड्रग्स खरिद गर्ने गरेको एनसीबीका सामु स्वीकारेपछि रियालाई १४ दिनका लागि न्यायिक हिरासतमा लिएपछि भायाखल जेलमा पठाइएको थियो । रिया र उनको भाइ शोविकको रिहाइका लागि आज मुम्बईको सेशन कोर्टमा सुनुवाइ हुने बताइएको छ ।
स्मरण रहोस् वलिवुड नायक सुशान्त सिंह राजपुत १४ जुनको आफ्नै फ्लाटमा आत्महत्या गरेको अवस्थामा फेला परेका थिए । सुरुमा वलिवुडमा हुने चरम नातावादका कारण नयाँ कलाकारहरुले वलिवुड क्षेत्रमा सहज पहुँच नपाउने र पाइहाले पनि संघर्ष गरिरहेका नयाँ कलाकारहरु त्यहाँभित्रको हेपाहा प्रवृत्तिका कारण डिप्रेशनमा जाने र आत्महत्याका कदम समेत उठाउन बाध्य हुने भनेर व्यापक आवाज उठेपनि पछिल्लो चरणमा बिहार प्रहरी हुँदै सीबीआईसम्म पुगेको उक्त आत्महत्या केसमा नयाँ नयाँ खुलासा हुँदै गएका छन् ।
वि.सं.२०७७ भदौ २५ बिहीवार १२:२० मा प्रकाशित
