हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)ले संवैधानिक आयोगमा पदाधिकारी नियुक्तीको काम छिटो सक्न सरकारलाई सुझाव दिएको छ । मंगलबार प्रधानमन्त्री निवास बालुवाटारमा बसेको सचिवालय बैठकले नियुक्तीको काम छिटो सक्न सरकारलाई सुझाव दिएको पार्टी प्रवक्ता नारायणकाजी श्रेष्ठले जानकारी दिए ।

‘विभिन्न संवैधानिक निकायहरुको पदपुर्तीको सन्दर्भमा सम्माननीय प्रधानमन्त्रीलाई संवैधानिक समितिको बैठक गरेर छिटो निर्णय लिन आजको बैठकले आग्रह गरेको छ’ बैठक पछि निर्णयहरु सार्वजनिक गर्दै प्रवक्ता श्रेष्ठले भने ।

उनका अनुसार संवैधानिक परिषदको बैठकलाई तत्काल सूचारु गर्न पनि बैठकले सरकारलाई आग्रह गरेको छ ।

हाल १३ वटा संवैधानिक आयोगमध्ये १० वटा आयोगमा ३९ पद रिक्त छन् । सत्तारुढ पार्टीभित्रको आन्तरिक खिचातानीका बीच आयोगमा पदपूर्ति ढिलाई भएको हो ।

त्यस्तै बैठकले सांगठनिक एकिकरणका बाँकी कामहरु पुरा गर्न अध्यक्षद्वय केपी शर्मा ओली, पुष्पकमल दाहाल ‘प्रचण्ड’ र महासचिव विष्णु पौडेललाई १० दिनभित्र ठोस प्रस्ताव पेस गर्न निर्देशन गरेको छ । पार्टी प्रवक्ता श्रेष्ठका अनुसार अध्यक्षद्वय र महासचिवको प्रस्तावमाथि छलफल गरेपश्चात एकताको बाँकी काम पुरा गर्ने खाका तयार हुनेछ ।