हामी सबैकाे संसारन्यूज

दौरा औ सुरुवाल आज गुनियो चोलो हराए किन
जस्का बाल मरे गरीब उनले अन्याय पाए किन
यौटाले अपराध गर्छ अरुनै पर्छन् वृथा जेलमा
यस्तो कानुन व्यर्थमा अब भयो चाहिन्न नेपालमा ।।१।।

हामी मस्त बसी सुरक्षित भयौँ जस्को भरोसा गरि
उस्ले नै डर दिन्छ दिन्छ मनमा धम्की हजारौँ थरी
को हुन् ती अब प्रश्न उठ्छ कि कसो यैँ दिन्छु लौ उत्तर
ती आफ्नै सरकारका गण त हुन् के गर्न सक्छौँ तर ।।२।।

कापी बन्द हुँदैन यी कलमले तिम्रा कुरा लेख्छु म
थुप्रै शोषण मात्र व्यर्थ दिनहूँ यी नेत्रले देख्छु म
यौटै मात्र उपाय शेष छ यहाँ सल्लाह यो दिन्छु म
कालीको रुप धर्नु पर्दछ तिमी यो चित्तले भन्छु म ।।३।।

पैसाले सजिलै प्रशासन बिके बाँकी त के पो छ र
यी आवाज विरोधका सडकमा को सुन्छ हे ईश्वर
हो खुट्टा बरु रोकिए पनि कतै रोकिन्न हाम्रो गला
तिम्रो न्याय छिटै हुनेछ बहिनी वाचा भयो निर्मला ।।४।।

थोत्रा भाषणका धनी दल बिचै छन् बिग्रिएका मति
कैल्यै हुन्न स्वतन्त्र राज्य अथवा यो राष्ट्रको उन्नति
ए प्यारा जनता बुझेर हिँड है यौटा यही नर्क हो
के लेख्छौ कवि हो नलेख कविता “नेपालनै स्वर्ग हो” ।।५।।

तिम्रा पोस्टर च्यातिए तर यहाँ छोडिन्न आन्दोलन
मैले सक्दिन भुल्न यो हृदयले तस्वीर यो जीवन
आमाको नजिकै गएर अहिले को दिन्छ आश्वासन
ए मेरो प्रिय पोखरा धनगढी ए राजधानी भन ।।६।।

(शार्दूलविक्रीडित छन्दमा)(साभार : प्रवासी आवाज)