हामी सबैकाे संसारन्यूज

बादललाई झरि बनेर झर्नु
फेरि वाफ भएर उड्नु
फेरि बादल बनेर थुप्रिनु
र फेरि झरि भएर झर्नु जस्तो
सजिलो कहाँ हो र
कोपिलाहरुलाई फूल भएर फक्रिनु ।
कोपिला भनेको
बैंसको मीट्ठो रङ्ग चड्नु हो
हावासँग मनपरि इत्रिनु हो
पुतलीहरुसँग बेस्सरी जिस्किनु हो ।
तर,
कोपिलाहरु फूल भएर फुल्नु भनेको त
सधैलाई बिर्सिदिनु हो आफ्नो वात्साल्य ।
हराइ पठाउनु हो पुतलीहरुलाई
लोभ्याइ राख्ने चंचलता
छोडीदिनु हो हावासँग इत्रिनु
उदाङ्गो पार्नु हो आफ्नो जम्मै सर्वाङ्ग ।

फूल भएर फुल्नु भनेको त
उदाङ्गो हुनु हो बन्द कोपीलाभित्रको कौमार्य
र छल्काइदिनु हो आफ्नो मादकता ।
आमन्त्रित गर्नु हो कामुक भमराहरु
उदण्ड मौरीहरुको मनपरि सहनु हो ।
छेउबाट हिड्नेहरुको आँखालाई लोभ्याउनु अनि
हातहरुलाई उक्साउनु हो ।

अण्डाबाट लाब्रे र
लाब्राबाट पुतली भएर उन्मुक्त उड्नु जस्तो
मज्जा कहाँ हो र
फूललाई फक्रिनु !
फूल भएर फक्रिनु भनेको त
चरम अवश्था हो बैँसको अनि
शुरुवाती समय हो ओइल्याउनुको ।
फूल भएर फक्रिनु भनेको त
तयारी हुनु हो
चुँडिनुलाई
हावासँगै छताछुल्ल हुनुलाई
भूँइभरि छरिनु अनि
सधैं सधैंलाई धुलोमा बिलिनुलाई ।
फूलको बैँस !!!