हामी सबैकाे संसारन्यूज

तिमीले के के काट्यौ कान्छा !
मैले दिन काटिरहेछु छ्याक छ्याक् छ्याक छ्याक्
तिमीले नेटो काट्दा
मैले लख काटिरहेथेँ
तिमीले पनि पक्का कुरा काटिरहेछौ
यस्तै हुन्छ विछोडपछिका अवस्थाहरु
रहन मुश्किल छ अडकल नकाटी
मेरै नाक काटिरहेथे त्यसपछि,
छिनो बदनामको हम्मर चोटको लिएर,
चौतारोमा बसेर मान्छेका छायाहरु ठ्याङ ठ्याङ
काटिरहेथे मेरै छाया ।
मैले दिनहरु काटेर,
केही रङ बनाएँ,
केही कालो केही रातो
केही हलो बनाएँ,
तीखो धारिलो,
धरती नच्याती उम्रन नयाँ दिनहरु,
मैले दिनहरु काटेर
टुक्रा टुक्रा पारें
बटुल्ने कैले जोड्ने कैले ।
हजुरआमा पिँढीमा बसेर बत्ती काट्दैछिन्,
ढुङ्गा काट्दैछन् बा !
हजुरआमाले त लाखबत्ती बाल्ने रे,
बा भने आफूलाई बनाउन नसकेर ढुङ्गा काटेर,
आजित भएका भए,
आफूलाई ढुङ्गामा कुद्न नसकेर ।