Sansar News
काठमाडौं । मुकेश चौरसिया हत्या प्रकरणमा पूर्वसभासद राजकुमार गुप्तासहित १२ जनाविरुद्व मुद्दा दर्ता भएको छ । चौरसिया हत्याको एक सातापछि जिल्ला प्रहरी कार्यालय पर्साले जिल्ला सरकारी वकिल कार्यालयमार्फत उनिहरु विरुद्व मुद्दा दर्ता गरेको हो ।
प्रहरीले मुद्दा दर्ता गरेका पूर्वसभासद गुप्ता प्रधानमन्त्री केपी शर्मा ओली निकटका नेता हुन् । ओली निकटकै भएको कारण प्रहरीले मुद्दा दर्ता गर्न अस्वीकार गर्दै आएको थियो ।
प्रहरीले दर्ता गर्न अस्वीकार गरेसँगै नेकपाका स्थायी समिति सदस्य मातृकाप्रसाद यादवको अगुवाईमा विरोध तथा धर्ना कार्यक्रमसमेत हुँदै आएको थियो ।
प्रहरीले मुद्दा दर्ता नगरेसँगै परिवारले शव बुझ्नसमेत इन्कार गर्दै आएको थियो । बिहिबार दर्ता भएसँगै शव बुझ्ने र अन्तेष्टी गर्ने काम पनि सुरु भएको छ ।
पर्साको विन्दवासिनी गाउँपालिकाको सपथ ग्रहण कार्यक्रममा नेकपाकै दुई पक्षबीच भएको झडपमा परी चौरसिया घाइते भएका थिए । घाईते चौरसियाको गत बिहिबार उपचारका क्रममा मृत्यु भएको थियो ।
वि.सं.२०७७ कात्तिक १३ बिहीवार १७:४७ मा प्रकाशित
