हामी सबैकाे संसारन्यूज

२६ कार्तिक, काठाडौं । नवलपरासी (बर्दघाट–सुस्तापूर्व) मा जुवाको खालबाट नगदसहित प्रहरीले आठ जनालाई पक्राउ गरेको छ । जिल्लाको कावासोती नगरपालिका–१५ गोडारमा मीनराज महतोको घरमा तास खेलिरहेको अवस्थामा रु एक लाख ८६ हजार ९०५ सहित आठ जुवाडेलाई पक्राउ गरिएको प्रहरीले जनाएको छ ।

कार्यालयका सूचना अधिकारी विशाल तामाङका अनुसार बिहान करिब १ः३० बजे उक्त रकम र तीन बुक ताससहित जुवाडे पक्राउ परेका हुन् । पक्राउ पर्नेहरुमा जिल्लाको देवचुली–११ का लीलबहादुर राना, कावासोती–१५ का युवराज महतो, मीनबहादुर थारू, रुमेश महतो, कावासोती–१७ का मधु मगर र डिल्लीराज भण्डारी, कावासोती–८ का जितेन्द्र शाह, बुलिङटार–४ का छालबहादुर मुम्मी रहेको तामाङले जानकारी दिए ।

पक्राउ परेका आठै जनाविरुद्ध मुलुकी अपराध संहिता, २०७४ को परिच्छेद ५ को दफा १२५ बमोजिम कसुरअन्तर्गत अनुसन्धान अगाडि बढाइएको प्रहरीले जनाएको छ । रासस