हामी सबैकाे संसारन्यूज

पुस २०, काठमाडौं । चर्चित मानवअधिकारवादी नेता कृष्ण पहाडीले प्रधानमन्त्री केपी शर्मा ओलीले देशलाई गृहयुद्धतर्फ लैजान खोजेको टिप्पणी गरेका छन् । सोमबार काठमाडौंमा आयोजित साक्षात्कार कार्यक्रममा बोल्दै उनले यस्तो टिप्पणी गरेका हुन् ।

‘यो एउटा मानिसले धैर्य गुमाएको परिणाम हो, यो खड्गप्रसाद जीको सनकको परिणाम, उहाँले देशलाई गृहयुद्धतर्फ धकेल्दै हुनुहुन्छ’, उनले भनेका छन् ।

उनका अनुसार ओलीले निम्ताएको परिस्थितिले देश नै रहने कि नरहने जस्तो अवस्था आएको बताए । ‘जननिर्वाचित निकाय ध्वस्त भएको अवस्थामा र राजनीतिक रिक्तता भएको अवस्थामा सबै खेल्नेहरुले ठाउँ पाउँछन, यस्तो उत्तर र दक्षिणतर्फबाट तानातान हुँदा हाम्रो एउटा हात चुँडिएर जान सक्छ’, उनले भने ।

पछिल्लो पटकको संसद विघटनबाट विश्व झनै चकित भएको पहाडीको कटाक्ष थियो । पार्टीको किचलोका कारण संसद बिघटन गरेको केपी ओलीको भनाईको कडा आलोचना समेत गरे ।

“संसदमा अविश्वासको प्रस्ताव आउछ भन्ने थाहा पाउनासाथ उनले संसद बिघटन गरे, आफ्नो पार्टीलाई पनि छोडेनन् र संसदलाई पनि छोडेनन्,” पहाडीको अगाडि भने, “सबै किसिमको संसदीय विकल्पको प्रावधान छोडेर उनले संसद बिघटन गरेका छन्, एकतिरबाट मात्रै ४० प्रतिशत भए पार्टी फुटाउन सक्ने जस्तो प्रावधान ल्याए, उनी मात्रै होइन माधब नेपाल र प्रचण्ड पनि यसका दोषी हुन् ।”