Sansar News
२२ पुष, काठमाडौँ । प्रतिनिधिसभा विघटनविरूद्ध परेको मुद्दाहरूमाथिको सुनुवाइ अर्को साता हुने भएको छ ।
बुधबारको संवैधानिक इजलासमा न्यायाधीश हरिकृष्ण कार्कीले नबस्ने घोषणा गरेपछि सुनुवाइ नै स्थगन भएको हो । सर्वोच्चले ले अर्को सुनुवाइ पुस २९ गते (बुधबार) गर्ने तय गरेको हो ।
बुधबारको संवैधानिक इजलासमा प्रधानन्यायाधीश चोलेन्द्रशम्शेर राणा तथा न्यायाधीश हरिकृष्ण कार्की, विश्वम्भरप्रसाद श्रेष्ठ, अनिलकुमार सिन्हा र तेजबहादुर केसीको रहेको थियो ।
तर बुधबारको सुुनुवाईमा वरिष्ठ अधिवक्ताहरुले प्रश्न उठाएपछि संसद् विघटन विरुद्धका रिटको संवैधानिक इजलासबाट न्यायाधीश कार्की अलग भएका हुन् ।
वरिष्ठ अधिवक्ता शम्भु थापा, रमण श्रेष्ठ र दिनेश त्रिपाठीले कार्कीको उपस्थितिप्रति प्रश्न उठाएका थिए । कार्की प्रधानमन्त्री ओली नेतृत्वको अघिल्लो सरकारका महान्यायाधिवक्ताको रुपमा रहेकाले मुद्दा हेर्दा स्वार्थ बाझिने वकिलहरुको तर्क थियो । बहसका क्रममा वकिलहरुले कार्कीको सहभागीताले जनतामा गलत सन्देश गएको बताएका थिए ।
सर्वोच्च अदालतमा रिट निवेदन दिएका १२ जना निवेदकहरुले संवैधानिक इजलाशको सट्टा बृहत् पूर्ण इजलासमार्फत सुनुवाई हुनु पर्ने माग सहित मंगलबार निवेदन पेश गरेका छन् । उक्त्त निवेदनलाइ आज संवैधानिक इजलास सुरु हुने वित्तिकै दर्ता गरिएको छ ।
आउने बुधबारको संवैधानिक इजलासमा यो मुद्दाको सुनुवाइ हुने बताइएको छ । सोही इजलासले नै बृहत पूर्ण इजलासमा मुद्दा पठाउने कि नपठाउने भन्नेमा निर्णय गर्नेछ।
वि.सं.२०७७ पुस २२ बुधवार १८:४६ मा प्रकाशित
