Sansar News
स्याङ्जा । नेपाल कम्युनिस्ट पार्टी (नेकपा) ओली खेमाले नेपाली कांग्रेसका कार्यकर्तालाई पार्टी प्रवेश गराउंदै गल्याङ नगर स्तरीय भेला सम्पन्न गरेको छ ।
पार्टी बिभाजनको प्रक्रियामा अगाडि बढिरहेका बेला नेकपाका दुबै पक्षले आ-आफ्नो समुहलाई बलियो बनाउन देशव्यापी कार्यकर्ता भेलालाई तिब्रता दिएका छन ।
सोही क्रममा नेकपा ओली खेमा स्याङ्जाले आज आइतबार गल्याङ नगर स्तरीय कार्यकर्ता भेला सम्पन्न गरेको छ । भेलामा निर्वाचित उपमेयर देवी थापा सहित अधिकांश निर्वाचित पदाधिकारी र पार्टी कमिटीका सदस्यहरुको उपस्थिति भएको ओली खेमा स्याङ्जाले जनाएको छ । सोही भेलामा नेपाली कांग्रेसमा आवद्ध रहेका १३ जना कार्यकर्ता नेकपामा प्रवेश गरेका थिए ।
भेलामा कृषि तथा पशुपंक्षी विकास मन्त्री तथा पार्टी केन्द्रिय सदस्य पद्माकुमारी अर्याल, पार्टी केन्द्रिय सदस्य तथा जिल्ला अध्यक्ष सुर्यप्रसाद गैह्रे (पारस) र केन्द्रिय सदस्यहरु मोहन रेग्मी, पुण्य भुसाल, मुक्ती पाठक, किशोर मल्ल लगाएतले मन्तव्य राखेका थिए । त्यस्तैगरि भेलामा अनेरास्ववियुका केन्द्रिय सदस्य रामु सापकोटा र युवा संघका केन्द्रिय भरत गोदारले मन्तव्य राखेका थिए ।
दानबहादुर थापाको अध्यक्षतामा भएको भेलाको सन्चालन छवि भुसालले गरेका थिए भने स्वागत मन्तव्य किसान श्रेष्ठले गरेको नेकपा स्याङ्जाले जनाएको छ ।
वि.सं.२०७७ पुस २६ आइतवार २०:५१ मा प्रकाशित
