हामी सबैकाे संसारन्यूज

१.
हिजोआज सपना देख्न मैले छोडेको छु
गन्तब्य पुग्ने सबै बाटो नै मैले मोडेको छु
नैतिकतालाई मिल्काएर अनैतिकतालाई गोडेको छु ।

२.
जमाना पनि कस्तो हौ खल्तीमा हुँदा वरवर पर्ने
उन्नति गरेको देख्न नसकी मीठो विष छर्ने
आपदबिपद आइपर्दा भने परपर सर्ने ।

३.
दैवको लीला उसैको खेल
छैन हामीमाझ रत्तिभर मेल
ज्यानमारालाई हुन्छ यहाँ बेल ।

४.
आउँदैन है फर्केर बितेको समय घरिघरि
कसैलाई यहाँ मरिमरि त कसैलाई परिपरी
मान्छे संसारको एउटै तर बिचार भने थरिथरी ।

५.
हुनेलाई महल छ निमेकीलाई झुप्रो
सोझासाझा जनतालाई समस्याको थुप्रो
छातीभित्र दन्कदैछ आन्दोलनको भुप्रो ।

६.
असारको झरी साउनको भेल
राजनीतिभन्दा कुटनैतिक खेल
गोर्खा बुद्धि यहाँ सबै नै फेल ।

७.
घरको दुश्मन घरैभित्र
वर्तमान समयमा समाजको चित्र
कस्ता जालिम हुँदा र’छन् कलियुग मित्र ।

८.
प्रकृतिको ताण्डव खेल
सहरमा बग्छ ढलको भेल
सरकारी योजना सबै फेल ।

९.
रामायण पढ्छन् मञ्चमा आई
भानुको जयन्ती मनाउनलाई
ढाका टोपीमा अङ्ग्रेजी टाई ।

१०.
हाँसिरहने मन यो मेरो
वरपर व्याप्त छ स्वार्थको घेरो
मृत्युपछि न मेरो न तेरो ।