हामी सबैकाे संसारन्यूज

सेसेल्स । गैरआवासीय नेपाली संघ राष्ट्रिय समन्वय परिषद् (एनआरएनए) सेसेल्सले अफ्रिकी मुलुक सेसेल्स सरकारको कोरोना राहत कोषका लागि आर्थिक सहयोग हस्तान्तरण गरेको छ ।

सेसेल्सका स्वास्थ्यमन्त्री पेग्गी भिगेडको उपस्थितिमा एनआरएनए एनसीसी सेसेल्सको तर्फबाट स्वास्थ्य बिभागकी उपनिर्देशक क्याथलिन सेसीललाई सेसेल्स रुपैया ४०,००० ( दुई लाख चालीस हजार रुपैयाँ बराबर) को चेक हस्तान्तरण गरिएको हो ।

बिहीवार आयोजित एक बिशेष समारोहमा एनआरएनए एनसीसीका तर्फबाट अध्यक्ष रामप्रसाद पन्त, मनोज बि.क. र रोजमेरी राईले उक्त रकम हस्तान्तरण गरेका थिए ।

पूर्वी अफ्रिकास्थित सयौ टापुहरुको सुन्दर देश सेसेल्सका पर्यटन उद्योगका विभिन्न क्षेत्रमा नेपालीहरु कार्यरत छन् । कर्म दिने देशलाई नेपाली समुदायको तर्फबाट सानै भए पनि सहयोग दिन पाएकोमा आफूहरु खुशी भएको अध्यक्ष पन्तले जानकारी दिए ।

कार्यक्रममा उपनिर्देशक सेसीलले सेसेल्स सरकारको तर्फबाट सेसेल्समा रहेको नेपाली समुदायलाई आभार ब्यक्त गरेकी थिइन् ।