हामी सबैकाे संसारन्यूज

२ चैत, जनकपुर । २० दिनदेखि हराइरहेका महोत्तरीका दम्पत्ती अझै भेटिएका छैनन् ।

महोत्तरी पिपरा गाउँपालिका ५ सहोडवाका ६५ वर्षी मुसाफिर झा र उनकी ६० वर्षीया श्रीमती गीतादेवी मुसाफिर झा बेपत्ता भएको २० दिनसम्म पनि अझै भेटिएका छैनन् ।

फागुन १० गते साँझ खाना खाएर उनीहरु सुत्ने तरखरमा थिए । गीतादेवी र उनकी बुहारी उषादेवी कुरा गर्दै थिए । मुसाफिर सुत्न भन्दै कोठामा छिरेलगत्तै गीतादेवी पनि छेउमै बनिरहेको कोठामा सुत्न गइन् । बुहारी पनि भान्साको काम सकेर छोरासँग अर्कै कोठामा सुतिन् ।
बिहान अवेरसम्म सासुससुरा नउठेपछि बुहारीले सासुससुरा सुतेको कोठा खोलेर हेर्दा दुवैजना त्यहाँ थिएनन् । उनी छाँगाबाट खसेजस्तो भइन् । रित्तो कोठामा जताततै रगतको छिटा थिए । उनले छरछिमेकलाई र प्रहरीलाई खबर गरिन् ।

त्यसयता बेपत्ता भएका झा दम्पत्ती अझै भेटिएका छैनन् । प्रहरी र परिवारले खोजी गरेपनि उनीहरुको अवस्था अज्ञात रहेको पनि सोमबारको कान्तिपुर दैनिकमा समाचार छ ।

प्रदेश २ प्रहरीका प्रमुख डिआइजी धीरजप्रताप सिंहका अनुसार झा दम्पत्तीलाई खोज्न भारत र मुलुककै अन्य प्रदेशसँग समन्वय भइरहेको छ । ‘घटनाको २० दिन भइसक्यो । हामी आफै चिन्तित छौं,’ डीआइजी सिंहले भने, ‘व्यक्तिगत पारिवारीक र आर्थिक पाटोबाट घटनाको अनुसन्धान भइरहेको छ । धेरै तथ्यहरु केलाउँदा घटनाको कारण नजिक पुगेका छौंै । केही दिनमै सबैकुरा प्रष्ट हुन्छ ।

प्रहरीको अनुसन्धानले मुसाफिरको जग्गा विवाद रहेका रामजी यादवले दम्पत्ती बेपत्ता प्रकरणमा झुटो बयान दिएको पनि पोलिग्राफ जाँचबाट खुलेको छ ।