Sansar News
२३ चैत्र, काठमाडौँ । #Tribute: पूर्वप्रधानसेनापति अर्जुननरसिंह राणाको निधन भएको छ । राणाको ९१ वर्षको उमेरमा आइतबार साँझ निधन भएको हो ।
कोभिड–१९ सङ्क्रमणबाट उत्पन्न निमोनियाका कारण वीरेन्द्र सैनिक अस्पताल छाउनीमा उपचारका क्रममा रहेका राणाको निधन भएको नेपाली सेनाका प्रवक्ता सन्तोषबल्लभ पौडेलले जानकारी दिए।
राणाले सन् १९८३ देखि १९८७ सम्म प्रधानसेनापतिका रुपमा नेपाली सेनाको प्रधानसेनापतिको जिम्मेवारी सम्हालेका थिए। सन् १९५८ मा उनको नेतृत्वमा पहिलो पटक नेपाल सेनाको पाँच जना अधिकृतको टोलि संयुक्त राष्ट्रसंघीय मिसन अन्तर्गत लेबनान(युनोगिल) गएको थियो ।
राणा पाकिस्तानका लागि पूर्वराजदूतसमेत रहेका थिए । उनी सन् १९८८ देखि १९९२ सम्म पाकिस्तानका लागि राजदूत रहेका थिए ।
१९३१ अप्रिल ८ मा ठमेलमा जन्मिएका राणा हाल ललितपुरको कुसुन्तीमा रहँदै आएका थिए । उनका चार छोरी छन्। उनको पार्थिव शरीरलाई सोमबार पशुपति आर्यघाटमा अन्त्येष्टि गरिने बताइएको छ।
वि.सं.२०७७ चैत २३ सोमवार ०७:४८ मा प्रकाशित
