Sansar News
२४ चैत्र, बुटवल । नेकपा(माओवादी केन्द्र)बाट निर्वाचित लुम्बिनी प्रदेशका प्रदेश सभा सदस्य दधिराम न्यौपाने र दिनेश पन्थी पदमुक्त भएका छन् ।
प्रदेश सभाको मंगलबारको बैठकमा सभामुख पूर्णबहादुर घर्तीले न्यौपाने र पन्थीको सांसद पद रिक्त भएको जानकारी गराएका हुन् ।
नेकपा माओवादी केन्द्र केन्द्रीय कार्यालयको जानकारी तथा प्रदेश सभा संसदीय दलको निर्णयको पत्र सचिवालयलाई प्राप्त भएअनुसार सभामुख घर्तीले न्यौपाने र पन्थीको पद रिक्त रहेको घोषणा गरेका थिए ।
न्यौपाने रुपन्देही क्षेत्र नंं १(२) र दिनेश पन्थी गुल्मी क्षेत्र नम्बर २(२)बाट निर्वाचित प्रदेश सभा सदस्य थिए। दुवैले माओवादी परित्याग गरी ओली नेतृत्वको एमालेको केन्द्रिय सदस्य बनेका थिए।
‘प्रदेश सभाको नियमावलीको १ सय ९२ बमोजिम दल त्यागको सूचना बैठकलाई दिएमा त्यस्तो सदस्यको स्थान रिक्त रहने मानिने छ भन्ने व्यवस्था रहेको छ ।
सोही व्यवस्था अनुसार सभामुख घर्तीले न्यौपाने र पन्थीको प्रदेश सभा सदस्य पद रिक्त रहने व्यहोरो सदनलाई जानकारी गराएका थिए ।
दुई जनाको पद रिक्त रहेको घोषणासँगै सभामुखले चालु संसद्को अधिवेशन पनि अन्त भएको घोषणा गरेका थिए ।
वि.सं.२०७७ चैत २४ मंगलवार २०:०४ मा प्रकाशित
