Sansar News
२४ चैत्र, काठमाडौं । नेपाल कम्युनिष्ट पार्टी (माओवादी केन्द्र) का अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ ले आफूले गलत मान्छेलाई विश्वास गरेर गल्ति गरेको बताएका छन् ।
३२ औं जनआन्दोलन दिवसका सन्दर्भ पारेर नेकपा माओवादी केन्द्रले मंगलबार रुकुम पश्चिममा आयोजना गरेको जन प्रशिक्षण कार्यक्रमलाई सम्बोधन गर्दै अध्यक्ष प्रचण्डले गलत मान्छेलाई विश्वास गरेर गल्ति गरेको बताएका हुन् ।
उनले केही नेताहरुप्रति संकेत गर्दै भने भने ‘संगठनमा कुनै प्रभाव नै नभएका मानिसलाई स्थायी समितिमा राखियो, त्यस्ता मानिस ‘बिकाउ’ साबित भए ।’
उनले अगाडि भने, ‘मलाई गद्दार भन्नेहरू गल्ती स्वीकार गर्दै आएपछि मैले विश्वास गरेँ । सायद मैले गल्ती गरेँ । म अब त्यस्तो गर्दिनँ ।’
विगतमा आफूहरुबाट भएका गल्तिहरु सच्याउने गरी आत्मालोचनासहित नयाँ सङ्कल्प गर्न नागरिक माझ आएको बताउँदै उनले विगतका वाचा, प्रतिबद्धता कहिल्यै नभुल्ने बताउँदै देश र नागरिकप्रति दायाँ–बायाँ नगरेको र अब पनि नगर्ने प्रतिबद्धता जनाएका थिए ।
वि.सं.२०७७ चैत २४ मंगलवार २०:४५ मा प्रकाशित
